Иранскиот претседател Масуд Пезешкијан денес ги повика муслиманските земји, пред самитот во Доха, да ги прекинат врските со Израел, како одговор на нападот што го изврши таа земја минатата недела врз претставници на палестинската милитантна група Хамас, кои престојуваа во Катар.

Пред да отпатува во Катар за да учествува на итно свиканиот самит на Организацијата за исламска соработка и Арапската лига по прашањето за израелскиот напад врз Доха, Пезешкијан рече дека состанокот се одржува на покана на катарскиот емир и дека тој ќе „се справи со прашањето за очигледната агресија“ од страна на израелскиот режим, што, според него, се случило и покрај сите меѓународни закони, пренесува ИРНА.

„Овој режим нападна многу исламски земји, вклучувајќи ги Катар, Либан, Ирак, Иран и Јемен. Прави што сака, а за жал, и Соединетите Американски Држави и европските земји ги поддржуваат овие акции“, рече Пезешкијан.

Тој нагласи дека израелскиот режим „врши геноцид во Газа“ и ги повика муслиманските земји да се одвојат од Израел.

„Исламските земји мора да го зголемат своето единство и кохезија против дејствијата на ционистичкиот режим и да се стремат злосторствата на овој режим да бидат гонети на меѓународни и правни форуми. Исламските земји мора да бидат обединети едни со други и, преку практични мерки во економската, културната и социјалната област, да ги прекинат своите врски со ционистичкиот режим“, заклучи Пезешкијан.