Eкипата на Интер го потврди ангажманот на голманот Хозе Мартинез (26) од Џенова.

Шпанскиот голман потпиша повеќегодишен договор со „нероаѕурите“, а според информациите на италијанските медиуми, Интер за него платил оштета од 12 милиони евра.

Планот на Интер е Мартинез на почетокот да биде втор голман покрај Јан Зомер, но веќе од сезоната 2025/2026 да го наследи Швајцарецот како долгорочно решение на голот.

Со добрите настапи на голот на Џенова привлече внимание на бројни европски клубови. Мартинез растеше во младинската школа на Барселона, но не доби шанса во првиот тим. По една сезона во Лас Палмас стигна понудата од Лајпциг, од каде што дојде во Џенова.

Џенова минатото лето го откупи за 3.5 милиони евра и сега од него ќе заработи скоро четири пати повеќе.