Неодамнешните обиди да се охрабрат луѓето да консумираат инсекти како одржлива замена за месо се осудени на неуспех, според нова студија објавена во научното списание „Одржливо земјоделство“, во која се наведува широко распространета аверзија кон идејата, особено во западните земји. И покрај фактот дека одгледувањето и консумирањето инсекти како црви, скакулци и мравки имаат значително помало влијание врз животната средина во споредба со традиционалното сточарство, што е една од главните причини за уништување на шумите, загадување на водата и емисии на стакленички гасови, истражувачите предупредуваат дека оваа предност тешко може да се реализира во пракса, пишува британскиот „Гардијан“, пренесува Политика.

Анкетите на јавното мислење во Соединетите Американски Држави и Европа покажуваат дека дури 91 процент од испитаниците би биле подготвени да пробаат замени за месо од растителна основа, додека само 20 проценти рекле дека би размислиле за јадење инсекти. Покрај културната аверзија, како пречки се наведуваат и економските фактори, имено фактот дека повеќето компании избираат да одгледуваат инсекти, како што се црните војнички муви, за храна за животни, а не за човечка консумација.

„Со оглед на овие предизвици, тешко е да се замисли дека храната базирана на инсекти би можела значително да го замени традиционалното месо“, се вели во студијата.

Во меѓувреме, глобалната потрошувачка на месо продолжува да расте, особено во економиите во развој како што е Кина, дополнително оптоварувајќи ги природните ресурси и климатскиот систем.

„Имаме ограничени ресурси и треба да ги насочиме кон најперспективните замени“, рече коавторот на студијата и извршен директор на Институтот за инсекти, Дастин Крамет, додавајќи дека одгледуваните инсекти постојано се рангираат меѓу најлошите замени за месо, а пазарот за такви производи е исклучително мал дури и во земјите што имаат традиција на консумирање инсекти.

Крамет додава дека иако инсектите се појавиле во некои случаи во производи како што се грицки и леб, овие производи се далеку од тоа да можат да го заменат месото.

Додека повеќето влади, објаснува „Гардијан“, избегнуваат воведување мерки за намалување на потрошувачката на месо поради политички ризици, Данска се издвои како исклучок со презентирање план во 2023 година за намалување на потрошувачката на месо и зголемување на производството на храна од растителна основа.

„Исхраната базирана на растителна основа е иднината. Ако сакаме да го намалиме климатскиот отпечаток на земјоделскиот сектор, треба да јадеме повеќе храна базирана на растителна основа“, рече данскиот министер за храна, земјоделство и рибарство Јакоб Јенсен во тоа време.

Крамет, коавтор на студијата, верува дека данскиот модел може да послужи како основа за развој на вистински алтернативи, наместо да очекуваме луѓето спонтано да се префрлат на исхрана базирана на инсекти.

„Треба да им понудиме на луѓето нешто што е вкусно, прифатливо и едноставно, а не само да морализираме, односно кога таа алтернатива е подобра по вкус, цена и достапност, само тогаш можеме да очекуваме да го намалиме влијанието на сточарството“, заклучи Крамет.

За потсетување, во Европската Унија, на виетнамската компанија „Cricket Van“ ѝ е дозволено да продава прав од домашен штурец (Acheta domesticus) од 24 јануари 2023 година. Ова брашно може да се додаде во стотици различни производи – леб, печива, бисквити и крекери, готови мешавини за леб и колачи, тестенини, сосови и супи, замени за месо и млечни производи, производи од компир и чоколадо. Истата одлука на ЕК неколку дена подоцна дозволи и преработка на ларвите од сјајната црна пченична мувла за човечка исхрана. Во тоа време, четири вида инсекти беа дозволени за храна во ЕУ, а уште осум апликации чекаа на одобрување. За да се добие зелено светло за комерцијална продажба, потребно е Европската агенција за безбедност на храната (EFSA) да ги вклучи ваквите производи на листата на безбедни и таканаречени нови прехранбени производи.

Патем, повеќе од 1.900 видови инсекти се користат во храната низ целиот свет. Сепак, според реакциите на организациите на потрошувачи кои ги анкетирале граѓаните, уште тогаш било јасно дека, барем во Европа, ваквите замени за месо тешко ќе се вклопат, бидејќи голем број од нив изјавиле дека помислата на јадење инсекти им предизвикува гадење.