Инклузивните градинки се цел на Министерството за труд и социјална политика и важни се и едукативните материјали наменети за сите деца, рече при денешната посета на објектот „Пчелка”, министерката за труд и социјална политика, Јованка Тренчевска.

Таа донираше инклузивни сликовници со брајово писмо за децата со оштетен вид. Сликовниците се издадени од страна на Здружението на граѓани „Свет на Различни а Еднакви”.
Министерката на својата посета ја истакна важноста на инклузивните материјали во предучилишното згрижување на децата.

Тренчевска,  која ја посети кумановската јавна детска установа „Ангел Шајче”, истакна дека заложбите на Министерството за труд и социјална политика за овозможување на пристап за секое дете во градинките се големи. Инклузивната средина, можноста секое дете да има пристап до едукативни материјали, вели, го поддржува развојот на детето и неговата полесна интеграција во социјалната средина.

Тренчевска посочи дека секоја градинка е место за секое дете и дека тоа ќе продолжи да биде позитивната пракса и во новите градинки кои се во план да се изградат во 2023 година.

Посетата на министерката беше и во предновогодишен дух, Снежана Конеска – Руси одигра предновогодишна претстава на која преку уметност им ги долови придобивките на инклузивните сликовници на децата и ја објасни нивната намена.