Министерката за финансии Гордана Димитриеска-Кочоска, која учествува на Глобалниот форум за транспарентност и размена на информации за даночни цели во Парагвај, вели дека тоа што во Македонија сè уште има високо ниво на корупција и криминал, иако сме членка на Глобалниот форум при Организацијата за економска соработка и развој уште од 2011 година, значи дека нешто се правело погрешно во минатото.

„Приоритет на новата Влада е да се бори со корупцијата и криминалот бидејќи тоа е единствениот начин за зголемување на приходите во Буџетот. Имаме рамни и многу ниски даночни стапки и огромна сива економија, па врз основа на тоа одлучивме дека е време да се работи на намалување на сивата економија. Во таа насока, а со цел ефикасно собирање на приходите, потребно е да разменуваме информации и да ги користиме сите капацитети што ни се на располагање“, рече Димитриеска-Кочоска.

Целта на меѓународната дискусија во Парагвај е да се обезбеди размена на финансиски информации меѓу државите, односно да се има контрола врз сметките не само на државјани во една земја, туку и на тие кои не се. Размената на информации би вклучувала детали за финансиската сметка и детали за сопственикот на сметката, а за ова да може практично да се применува потребни се закони и административна подготовка. Ваквото законско решение, врз основ на кое ќе се води битката со даночното затајување и размената на информации со други земји, дома, во Македонија е во фаза на подготовка, информираат од МФ.