Иако пристигнале 18.805 апликации за добивање субвенции за клима уреди, ќе се доделат само 8.000 ваучери преку новото Министерство за енергетика, објави Радио Слободна Европа.

Се уште не се знае кога граѓаните ќе ги добијат ваучерите, иако документи за оваа мерка поднесуваа уште во февруари, а крајниот рок да ги вградат климите е 30 ноември. За овие ваучери, за кои претходната Влада на Министерството за економија му определи буџет од 4,1 милиони евра, има рекордни 18.805 барања, два пати повеќе од бројот на ваучери што ќе се доделат.

Според информациите на РСЕ, застојот, делумно е поради изборите што во Северна Македонија се одржаа во април и во мај, а делумно и поради реорганизацијата на министерствата во новата Влада.

Сега, наместо Министерството за економија каде граѓаните поднесуваа барања, ваучерите ќе ги доделува новоформираното Министерство за енергетика, рударство и минерални суровини, потврди министерот за економија и за труд, Бесар Дурмиши.

Право на учество имаа домаќинствата кои во минатите три години не користеле субвенции за инвертри или печки на пелети и немаат приклучок на централно градско греење.