Во неколу основни училишта во Тетово, каде настава следат и деца со посебни потреби инклузирани со останатите ученици, но и во посебни паралелки, во рамки на проектот „И ние сме како другите“, одржани се повеќе креативни работилници за оваа категорија ученици, кои како што велат нивните родители, недостасуваат во рамки на образовните институции.

Потребно е на ниво на Општина Тетово, да се отвори еден креативен центар за деца со посебни потреби, каде учениците после редовната настава, би можеле креативно да го поминат своето време, додека ги чекаат нивните родители да завршат со нивните обврски на работното место.

„Со родителите сме разговарале за проблемите на децата со посебни потреби. Родителите на тие работилници се жалат и бараат општината и Министерството за труд и социјална политика да им обезбеди еден центар, каде децата кои одат на училиште, остатокот од денот додека нивните родители им се на работа да го поминат во центарот, а тој да биде креативен центар. Да биде во Тетово, да има простор кој ќе може да се приспособи за оваа категорија деца“, рече Гзиме Хајредини од невладината организација Златна река.

Дел од родителите на учениците со посебни потреби кои се од тетовските села, приморани се да живеат под кирија во Тетово, каде нивните деца следат настава во тетовските училишта.

„На мајките кои им се придружници на децата кои одат на училиште во Тетово им се наплаќа патот и тоа е голем проблем, за тие што се од село, па дел од нив се принудени да живеат под кирија во Тетово оти така им е поевтино отколку да плаќаат за превоз. Голем проблем е што училиштата немаат логопеди, а законски треба да имаат. Има асистенти, но треба да има и логопеди, каде има деца со посебни потреби“, рече Гзиме Хајредини од невладината организација Златна рака.

Дел од учениците со посебни потреби се инклузирани во основните училишта во Тетово, но во две училишта има посебни паралелки каде настава следат 34 ученици.