Премиерот Зоран Заев и новиот претседател на СДСМ со претседателите на помалите партии од коалицијата наредната недела ќе прецизираат дали освен министерот без ресор одговорен за дијаспората од Алтернатива, ќе има и министри без ресор за странски инвестиции од партијата на Турците, како и министер без ресор за спроведување на стратегијата на Ромите. Понуда за министер без ресор има и до НСДП, која има двајца пратеници, а не е застапена со министер во Владата. Ако НСДП ја прифати понудата, можно е од нивните редови да има министер без ресор одговорен за образованието.

Ова се најновите комбинации што ни ги кажа висок функционер на Владата, што ќе се разгледуваат доколку партиите што се помали коалициски партнери ја прифатат понудата на Заев за враќање на неколку министри без ресор. Во спротивно, новата влада ќе има само една таква функција, резервирана за Алтернатива (за дијаспора), како што веќе се договорија Заев и лидерот на Алтернатива Африм Гаши, при преговорите за проширувањето на владиното мнозинство во Собранието. Помалите партии првично беа против враќање на министрите без ресор.

Според изворот на „Слободен печат“, нема дилеми дека договорот со Алтернатива ќе се спроведе, само ќе треба да се допрецизираат некои од спорните одредби. Како што веќе објавивме, Алтернатива е подготвена на компромиси, односно не инсистира на нов закон за рамномерен регионален развој туку амандманска интервенција за Липковскиот регион, како и за мониторинг на судските предмети, односно за партијата е битно Владата да испрати писмо до Европската комисија, со цел тим независни европски експерти да ги преиспита спорните судски случаи.

– Новиот лидер на СДСМ, кој ќе треба да биде и нов мандатар, заедно со коалициските партнери ќе го утврдат текстот на новите начела од програмските определби на Алтернатива, кој ќе стане составен дел од владината програма – вели владиниот функционер.

Кандидатот за претседател на СДСМ Димитар Ковачевски вели дека ако биде избран за претседател на партијата и нов мандатар, верува дека ќе се договори со коалициските партнери и дека ќе се формира влада со јасна ЕУ-ориентација. Тој не сакаше да прејудицира што ќе се случи ако помалите партнери останат на ставот дека на Владата не ѝ требаат министри без ресор и дали тоа може да го комплицира договорот со Алтернатива.

Кандидатот за претседател на СДСМ Јован Деспотовски, иако смета дека не е потребно враќање на министрите без ресор, сепак ако стане лидер на партијата и мандатар, не би имал проблем да го спроведе договорот со Алтернатива.

– Сметам дека укинувањето на министрите без ресор беше добар потег на премиерот Зоран Заев по изборите во 2020 година. Ова го кажувам бидејќи голем број позиции беа без јасно дефинирана задача, цели и резултати што треба да се постигнат. Како кандидат за претседател на СДСМ, презентирав јасни и мерливи резултати за мојата работа. Истото го воведуваме за сите членови на Владата, но и носители на јавни функции генерално. Бројот, но и дефинирањето на задачите и на конкретни цели за министрите, како и носителите на јавни функции, по сите укажувања мора да претрпи корекции и рационализација. Договорот помеѓу СДСМ и Алтернатива сакам да го гледам низ призмата на крајната цел – стабилна држава, што влегува во последниот круг разговори со Бугарија, а со тоа и датум за преговори со ЕУ. Имајќи го ова предвид, сè додека имаме јасно дефинирани задачи и мерливи резултати за членовите на Владата и за другите функционери, не би имал проблем да се спроведе договорот на СДСМ со Алтернатива, онака како што е предвиден – ни изјави Деспотовски.

Иако за ова прашање побаравме, не добивме став од кандидатката за претседател на СДСМ Фросина Ременски.

Идната недела се очекува да бидат избрани директорите од Алтернатива, додека на изборот на министрите ќе се чека кон крајот на годината, за кога новиот мандатар треба да ја предложи програмата и новиот состав на владиниот кабинет.