Основната плата на информатичарите, вработени во новата Агенција за безбедност на мрежни и информациски системи и дигитална трансформација, ќе биде речиси иста како просечната исплатена во ИК-секторот, според последниот извештај на ДЗС од претходната година.

Тоа значи дека ако, на пример, годинава просекот во овој сектор бил околу 70.000 денари, на толкава плата ќе може да сметаат и оние што догодина ќе сакаат да се грижат за информатичките и комуникациските технологии во државните институции. Ова е една од новините во новиот Предлог закон за безбедност на мрежни и информациски системи и дигитална трансформација, а која треба да послужи како мотив да се задржи постојниот и да се привлече нов стручен кадар во администрацијата.

Идејата е преку таа агенција да се решат и предизвиците во сферата на човечките ресурси, бидејќи таа институција ќе биде пофлексибилна и од аспект на плаќање на тие експерти, но и од аспект на соработка со приватниот сектор. Објаснувајќи го новиот концепт, министерот за информатичко општество и администрација Азир Алиу, предупреди дека е алармантен одливот на ИКТ кадарот од државните институции. Според него, актуелните плати, не се доволни ваквите стручњаци да се задржат во државната администрација, а тоа го вклучи алармот кај сите институции.

Од она што може да се види по огласите кои се распишуваат за овие позиции во министерствата, агенциите или јавните претпријатија, платата се движи од 24 до 27.000 денари, па јасно е зошто нема интерес, додаваат доброупатените.

– Токму затоа нештата ќе мора да се променат. Покрај другите регулаторни тела, определени прашања за работниот однос на административните службеници во целост или делумно, да можат да се уредуваат со закон и со Колективен договор, на начин различен од Законот за административни службеници, како што во конкретниот случај се утврдени во стручната служба на Агенцијата – додаде Алиу откривајќи делови од новиот Закон на брифинг со новинарите.

Министерот истакна и дека сајбербезбедноста во моментот во државата е без правна регулатива. Токму затоа новиот закон треба да ги покрие празнините, а тоа ќе биде намената на новата државна Агенција, која ќе биде регулаторно тело.

– Агенцијата ќе биде самостојна, а ќе одговара пред Владата. Моделот е избран од Словенија, која е најблиска со нашето законодавство – посочи Алиу.

Една од клучните цели е дигиталната трансформација на јавниот сектор со кој ќе се предвиди трансформација односно транзиција од дистрибуирана дигитална инфраструктура кон централизиран пристап во Владин облак.

– Зајакнувањето на сајбербезбедноста, каде што технолошката војна станува пософистицирана и „построга“, е предизвик што бара внимание, посветеност и соработка. Сајбербезбедноста е едно од најважните прашања и е главен фокус на нашето Министерство. Затоа, приоритетна иницијатива на МИОА, која исто така беше поддржана од Владата, е формирањето на Агенцијата за дигитализација, која ќе служи како главна и одговорна институција за спроведување и координација на дигиталната трансформација. Постојат многу предизвици во областа на сајбербезбедноста и тоа не само за јавниот сектор, туку и за приватниот сектор. Сите сме во иста позиција. Само преку соработка, сериозни инвестиции можеме да одговориме на предизвиците во иднина – заклучи Алиу.

Годинава според достапните податоци, во земјава се случиле најголем број пријави за хакерски напади врз државни институции. Поточно до средината на август 2023 година, имало 155 пријави, од кои 12 се водат како сериозни инциденти.