И Бугарија се обидува да го следи примерот на Хрватска, Босна и Херцеговина и Црна Гора со повик за бојкот на трговците. Организатор на протестот е Движењето „Системот нè убива“, Федерација на потрошувачите во Бугарија и Обединетите пензионерски синдикати. Тие на социјалните мрежи повикаа за национален протест. Еве како гласи нивната објава: Во последните недели во трговските синџири и во сите помали продавници за прехранбени производи забележано е драстично зголемување на цените на стоките, објави „24Часа.бг“.

Овој ценовен шок е вистинска катастрофа и за 800.000 пензионери кои живеат под прагот на сиромаштија, како и за сиромашните работниците во Бугарија, кои не можат да ги покријат основните трошоци за храна и живот. Бугарија е најсиромашната земја во Европската Унија, со животен стандард понизок и од некои земји од Западен Балкан, кои не се членки Европската Унија. Уште побезобразно е што цените на путерот, млекото, сирењето, месото и колбасите се повисоки во нивните бугарски филијали отколку во нивните земји во кои животниот стандард е неспоредлив со нашиот. На 13 февруари да им покажеме на трговците дека во Бугарија има граѓани кои повеќе нема да толерираат ценовно самоволие, стои во објавата.