Американскиот претседател Доналд Трамп се закани дека ќе воведе 100% царина на производите од производителот на Барби, „Мател“, откако компанијата објави дека ќе го прошири своето производство во други земји, но не и во Соединетите Американски Држави, објави НОВА. Инон Крајц, претседател и извршен директор на „мател“, рече дека дури и со царините, трошоците за производство во САД се превисоки за да ги направат играчките достапни, дури и за самите Американци. Крајц рече дека „значаен дел“ од создавањето на играчката сè уште се прави во Соединетите Држави – дизајн, развој, инженерство на производи и управување со брендови – но дека нивното производство во странство овозможува квалитетен и достапен производ. Околу 20% од играчките на „Мател“ увезени во САД доаѓаат од Кина.

Извршниот директор додаде дека компанијата се надева дека ќе го намали овој удел на 15% следната година, а до 2027 година – до 10% или помалку. Оваа година, „Мател“ планира да го премести производството на 500 од своите играчки од Кина во други земји, како што е Индија. На прашањето дали царините од 145% на Трамп за кинески стоки или други слични царини ќе го натераат „Мател“ да го пресели своето производство во САД, Крајц повторно рече: „Не очекуваме тоа да се случи“, пренесува „Телеграф.бг.“