Трета година по ред, хрватскиот Национален полициски синдикат организирал спа-викенд за своите членови и нивните семејства во познат хотел во земјата, но оваа година дружбата не поминала добро – педесетина членови на групата во саботата наутро се пожалиле на повраќање, болки во стомакот и дијареа, пишува „Јутарњи лист“.

Собирот траел од 5 до 8 декември, но во саботата наутро, еден по еден синдикалците и нивните придружници почнале да чувствуваат дигестивни проблеми. Кога ситуацијата ескалирала и веќе имало неколку десетици луѓе со симптоми, организаторот на патувањето ја известил управата на хотелот, кој веднаш се јавил во епидемиолошката служба на Заводот за јавно здравје на округот Меѓумурје. Инспекторите излегле на терен за да утврдат за каков здравствен проблем се работи.

Некои се сомневале на труење со храна, а на крајот се потврдило дека педесетина гости биле жртви на норовирусот – кој навистина се шири преку конзумирање храна и пијалаци, пишува хрватскиот медиум.

„Да, можам да потврдам дека сето тоа навистина се случи. Трета година по ред организиравме патување во истиот хотел, бидејќи секоја година таму си поминувавме одлично, а идејата беше да се собереме за членовите на нашиот Синдикатот и нивните семејства. Но, сепак, во саботата наутро луѓето почнаа да се јавуваат со проблеми, па веднаш го известивме хотелот, кој потоа ги повика епидемиолозите. За среќа, по враќањето дома веќе никој не се пожали на здравствени проблеми, па на крајот заврши добро“, изјави претседателот на Националниот полициски синдикат, Боно Томашевиќ.

Сепак, имаше и гости кои не се задоволни од начинот на кој се спроведувало натамошното сузбивање на заразат, а особено од тоа што, тврдат, официјално од никого не биле информирани дека имало ширење на норовирус, туку за тоа добиле информации случајно, преку разговор.

„Немаше информација што се случило, па никој официјално не ми кажа дека во хотелот е присутен норовирус, што мислам дека е важно бидејќи имам имунокомпромитирано дете кое престојуваше со мене во хотелот. Не само што не информираа што се случува, туку и никој не ни кажа дека во хотелот има епидемиолози и немаше инструкции како понатаму“, изјавил еден гостин за „Јутарњи лист“.