ХРВ: Израелскиот систем за дистрибуција на помош во Газа е „стапица на смртта“
Израелските сили имплементираат „неуспешен и милитаризиран“ систем за дистрибуција на помош во Појасот Газа, што ја претвора оваа хуманитарна операција „во вистинско крвопролевање“ и „стапица на смртта“, осуди Хјуман рајтс воч (ХРВ) во својот извештај.
Препорачано
„Убиствата од страна на израелските сили на Палестинците кои бараат помош се воено злосторство“, додаде невладината организација во извештајот што го објави денес.
„Катастрофалната хуманитарна ситуација (во Газа) е директна последица од употребата на глад од страна на Израел како оружје во војната – воено злосторство – како и од неговото намерно и континуирано попречување на хуманитарната помош и основните услуги“, нагласи ХРВ.
По 22 месеци разорна војна, која избувна по нападот на Хамас врз Израел на 7 октомври 2023 година, Појасот Газа е под закана од „општ глад“, според ОН, и е целосно зависен од хуманитарна помош.
Израел делумно ја ублажи кон крајот на мај целосната блокада што ја воведе на почетокот на март врз палестинската енклава, што доведе до сериозен недостиг на храна, лекови и други основни производи.
„Инциденти со повеќе жртви се случуваат речиси секојдневно во четирите центри за дистрибуција на помош управувани од Хуманитарната фондација за Газа (ГХФ)“, организација поддржана од САД и Израел, со која меѓународните организации одбиваат да соработуваат.
„Најмалку 859 Палестинци се убиени додека се обидувале да добијат храна од овие центри на ГХФ од 27 мај до 31 јули, повеќето од нив од страна на израелската армија, според ОН“, истакна ХРВ.
„Израелските сили не само што намерно ги изгладнуваат палестинските цивили во Газа, туку и речиси секојдневно пукаат врз оние кои очајно бараат храна за своите семејства“, рече Белкис Вил, заменик-директор на одделот за кризи и конфликти на ХРВ.
„Израелските сили, со поддршка на САД и приватни бизнисмени, создадоа неуспешен и милитаризиран систем за дистрибуција на хуманитарна помош што ги претвора операциите за дистрибуција на помош во вистински крвопролевања“, додадоа од таму.
Овој систем на „стапици на смртта“ поддржан од САД „мора да се напушти“, инсистира ХРВ.
