Шпанскиот напаѓач Хоселу беше вистински херој на Реал Мадрид со двата гола во завршницата од полуфиналниот натпревар против Баерн Минхен, но не е сигурен дека и наредната сезона ќе игра во Мадрид.

Хоселу на мала врата се врати во Мадрид минатото лето, меѓутоа сега ги дочека своите „пет минути“ слава. Против Баерн во игра влезе во 81. минута на местото на Феде Валверде и со головите во 87. и 91. минута обезбеди финале за својот тим. Во овој момент Хоселу во Реал Мадрид настапвуа како позајмен фудбалер од Еспањол и „кралевите“ можат да го откупат неговиот договор за 1.5 милион евра што секако за нив не е проблем ако се заинтересирани за такво нешто.

Засега во овој момент нема информации какви се плановите на Реал, а и самиот Хоселу не знае дали наредната сезона ќе игра на „Бернабеу“.

„На таа тема ќе разговараме на крајот од сезоната, во овој момент може да кажам само дека сум многу среќен што сум тука и што ми се случуваат вакви моменти. Навистина уживам овие денови, меѓутоа мојот фокус е на следниот натпревари. Добивам голем број честитки, но најдраги ми се оние од најблиските“, изјави Хоселу.