Според поранешниот министер за финансии Џевдет Хајредини, Интервентниот план за инвестиции за периодот од 2021 до 2027 година, тежок над 8 милијарди евра, е утопија и неговото донесување не е легитимно без да се разгледа во Собранието.

– Овој план е утопија. Тој е целосно нерелаен и е во функција на претстојните локални избори. На пример, последните дваесeтина години многу пати се најавуваа по 10-тина милиони евра во Попова Шапка. Тетово, во пракса, е урбицит, а на Попова Шапка има основа за повеќе кривични пријави. Без поддршка на Заев, Теута немаше да биде градоначалник, па затоа и сега се вади план за инвестиции на Шапка. Но еве, јавно го прашувам премиерот, кој е инвеститорот на Шапка, оној за кој тој зборуваше, дека се во завршна фаза на потпишување на договор и кој е познат инвеститор во скијачки центри во Европа, или оној за кој зборуваше Бујар Османи во Тетово,  кој е од Абу Даби и кој ќе гради и голф терени на Шапка? – вели Хајредини, за „Слободен печат“.

Тој оценува дека не е можно такви крупни планови, како инвестициски план од 8 милијарди евра, едноставно да биде соопштен од премиерот на државата, без да биде разгледан од Собранието.

Хајредини, потсети и дека најавите за големите енергетски проекти се стари со децении и дека нивното повторно ставање во планот за релизација не е доказ дека ќе се реализираат.

– Проектот за Вардарска долина е стар 30 години, 20 години се зборува за изградба на Чебрен, а малите централи се средство за корупција, затоа што енергетски не значат ништо и тоа го зборувам како човек кој дел од својот живот бил во овој сектор – вели Хајредини.