Западните земји кои во изминатиот период ѝ испорачуваат модерно оружје на Украина сега поединечно се произнесуваат дали дозволуваат нивното оружје коешто е донирано, дадено или продадено да биде користено и за какви цели во војната со Русија. Украина како нападната земја има легитимно право тоа оружје да го користи за своја одбрана, вели проф. д-р Методи Хаџи Јанев во анализата во емисијата „Слободен печат“ и додава дека според Механизмите за контрола на пролиферацијата на оружјето, земјата којашто е производител на оружје има право да и забрани на земјата корисник во договорите користење на испорачаното оружје. Засега користење дозволија Канада, Чешка, Холандија, Франција, Финска, Обединетото кралство и балтичките земји како и Полска и Шведска.

-Од државите коишто го донирале тоа оружје е дадено зелено светло дека е легитимно, согласно Меѓународното воено право Украина да го користи тоа оружје на територија на Русија бидејќи тоа е начин преку кој таа ќе може да се одбрани. Тоа се методи на војување и спаѓаат во еден од трите столба на Меѓународното воено право затоа што станува збор за војна таму. Од друга страна, Столтенберг е во право кога вели Украина на тој начин има право се брани, но во право е и Путин кој вели ако вие тоа го користите, станувате легитимна цел, бидејќи согласно Меѓународното право, посебно преку судската пракса на Меѓународниот суд на правдата, е констатирано дека некоја од завојуваните страни добива помош во оружје, ресурси и слично од друга страна, тогаш таа страна е страна во вооружен конфликт, вели Хаџи Јанев.

Доколку во реалноста навистина се случи употребата на западното оружје за напад на Русија и мети на руска територија, тоа ќе предизвика ескалација на воените дејства до размери кои можат само да се претпостават и до исход кој може да има серозни последици врз Европа.

-Во реалноста тоа може да предизвика сериозен проблем или каскадни ефекти во смисла на ескалација на состојбата надвор од Украина. Тоа не мора да значи дека ќе има масовни операции, но може да има одмазднички напади. Тоа е веројатно, но дали ќе се случи, ќе видиме, зависи од калкулусот на анализата на ризици која ќе се направи – што ќе значи тоа ако Путин врати на НАТо земја, дали тоа ќе значи дека НАТО земја е нападната, дали членот 5 ќе се активира, дали ќе има единство или НАТО ќе треба да формира Коалиција на волјата како што беше тоа за време на Глобалната војна против тероризмот, вели Хаџи Јанев.

Според членот 5 од Северно – атланскиот договор, ако сојузник на НАТО е жртва на вооружен напад, секоја друга членка на Алијансата ќе го смета овој чин на насилство како вооружен напад врз сите членки и ќе ги преземе активностите што смета дека се неопходни за да му помогне на нападнатиот сојузник. Но одлука за ова, вели Хаџи Јанев мора да се постигне со консензус на земјите членки на НАТО.

-Словачка, Унгарија, Италија се земјите кои веќе изразуваат воздржаност за ваков пристап. Италија во целата оваа бркотница која сега се случува дури и повлече дел од своите системите кои и ги даде како компензација на Словачка како системи за противвоздушна одбрана особено заради тоа што не сакаше да биде доведена во ситуација нејзино оружје да биде вмешано во некаков директен конфликт или затоа што сфати дека ресурсите за потхранување на овие системи се веќе лимитирани односно нема капацитет да се произведат толку многу колку што се користи во Украина. Сите овие параметри сега ќе ја одгатнат равенката која се поставува помеѓу двете спротивставени страни, НАТО и Украина, на една страна, Русија и авторитарното режими коишто ја поддржуваат на друга страна, вели Хаџи Јанев.

Од друга страна американската страна иако донираше и ги повикува европските земји да ја помогнат одбраната на Украина со оружје и муниција, не дава виза за користење на истото.

-САД имаа конзистетни ставови и водат дипломатија која генерално држи една иста линија и заради тоа уште потенцираат нивните системи не дозволуваат да се користат на тлото на Русија поради тоа што може да има полоши каскадни ефекти, полоши последици кои ќе иницираат конфликт за кој според нивните анализи за ризик, во сегашниот момент не им е потребен, во однос на она што сега се случува на Пацификот и на Блискиот Исток, дециден е Хаџи Јанев.

Целата анализа на проф. д-р Методи Хаџи Јанев погледнете ја во продолжение: