Американскиот федерален суд вчера му наложи на технолошкиот гигант „Гугл“ да плати казна од 425,7 милиони долари за шпионирање на луѓе преку нивните смартфони во текот на речиси цела една деценија, jавија светските медиуми.

Пресудата од средата во федералниот суд во Сан Франциско следеше по повеќе од две недели судење во групна тужба која се однесуваше на околу 98 милиони корисници на телефони во Соединетите Американски Држави помеѓу 1 јули 2016 година и 23 септември 2024 година.

Ова значи дека вкупната отштета досудена во петгодишниот случај е околу четири долари по корисник. Доколку се земе предвид нето добивката на „Алфабет“, компанијата-мајка на „Гугл“ во 2024 година (околу 100 милијарди долари), казната која му е изречена на гигантот изнесува само 0,425% од неговиот лански ќар.