Гугл објави дека ќе отпушти стотици инженери и подготвува стотици отпуштања, по плановите да ја зголеми употребата на генеративната вештачка интелигенција. Стотици инженери во главниот тим на софтверскиот гигант и работници во одделот за апликации „Гласовен асистент“ ќе останат без работа. Планирани се и отпуштања за хардверскиот тим одговорен за Пиксел, Нест и Фитбит и за поголемиот дел од тимот за зголемена реалност (АР).

Во 2021 година, Гугл ја купи компанијата за следење здравје и фитнес Фитбит за 2,1 милијарди долари, а потоа лансираше нови верзии на Пиксел воч, производ што се натпреварува со некои Фитбит уреди и Епл воч.

„Во втората половина на 2023 година, многу од нашите тимови направија промени за да станат поефикасни и да работат подобро и да ги усогласат ресурсите со врвните приоритети на производите. Некои тимови продолжуваат со организациски промени кои вклучуваат намалување на некои работни места ширум светот“, изјави портпаролот на Гугл.

Тој не прецизираше колку работни места ќе бидат укинати, ниту пак даде бројка за Гугл Асистент и другите тимови. Отпуштањата се совпаднаа со зголемената употреба на генеративна вештачка интелигенција во компании како Мајкрософт и Гугл по успехот на Четџипити на ОпенАИ.

Минатата година Гугл објави дека ќе го збогати виртуелниот асистент со можности за генеративна вештачка интелигенција. Пред една година, Алфабет објави дека ќе отпушти 12.000 работници, што е еднакво на шест проценти од нејзината светска работна сила. Во септември 2023 година, Алфабет вработуваше 182.381 работници.