Топло време, луѓе со чадор /Фото: Слободен печат / Драган Митрески

Граѓаните „прегореа“ на жештините, на плус 40 претешко се живее во Скопје

Во вакви тропски временски услови, освен препораките на Владата, кои не се обврзувачки, па голем број фирми не ги почитуваат во однос на вработените, речиси нема друга помош за граѓаните во овие жешки денови. Ниедна од општините во овој период не понудила никаква помош за скопјани, барем да се обезбеди вода по улиците. Единствено се активни волонтерите на Црвениот крст.

Тешко е да се биде жител на Скопје и секојдневно да се извршуваат работните и сите други обврски во услови кога температурите се над 40 степени, кога асфалтот гори и кога едвај се дише од жештините од кои речиси е невозможно човек некаде да се скрие. Ако кон тоа се додаде и фактот дека голем дел од домовите во овие услови се без вода, па немаат ни основни можности за одржување лична хигиена и хигиена во домот, тогаш јасно е дека е повеќе од тешко за „преживување“.

И додека Владата дава препораки како граѓаните да се справат со топлото време, а Итната помош има полни раце работа, загрижувачки е тоа што самата инфраструктура на градот го отежнува секојдневното функционирање, а јавните услуги не се приспособени на потребите на луѓето особено не во вакви поекстремни ситуации.

Вистински предизвик е, на пример, човек да помине на градскиот плоштад, каде температурата се искачува и над 50 степени, а сенки нема, затоа што на времето кога се правеа статуи и фонтани и се редеа бели плочки, никому не му текна да направи зелен појас околу фонтаната или да засади дрвја што би влијаеле врз намалувањето на температурите.

Топло време - 26,06,2025 - Фото Слободен печат - Методи Здравев
Топло време – Фото Слободен печат – Методи Здравев

Проблем е и минувањето на крстосниците, кои важат за топлински зони каде што температурите се и по 15 степени повисоки од официјално измерените и каде што главите на пешаците „чадат“ додека чекаат да се вклучи зелено светло на семафорите. Поранешното градско раководство на чело со градоначалникот Петре Шилегов, при крајот на мандатот најави поставување заштитни стреи на најжешките премини, проект што требаше да се реализира во соработка со УНДП.

Поради „изгор“ температурите од денеска бремените жени и лицата постари од 60 години се ослободени од работа

Во тој период беа направени мерења со термални камери на неколку локации и беше утврдено дека на девет пешачки премини температурата се движела меѓу 50 и 55 степени Целзиусови, а највисоката температура од 60,3 степени била измерена на крстосницата кај зградата на поранешниот НИП.

Со цел обезбедување заштита од топлина за пешаците и велосипедистите и намалување на температурите, на 9 пешачки премини Град Скопје во наредниот период ќе го реализира проектот за поставување заштитни стреи (перголи). На 9-те пешачки премини е исто така утврдено дека природното разладување, т.е. садење дрвја со кое би се намалила температурата е невозможно или, пак, нема никакви услови за тоа и од тие причини со поставување заштитни стреи ќе се намалува ефектот на урбаните топлотни острови – објаснија тогаш градските власти.

Проектот не се реализираше, а новото раководство на Град Скопје предводено од Данела Арсовска повеќе не го ни спомена.

Бездомноци на топло време - Фото Слободен печат - Методи Здравев
Бездомници на топло време – Фото Слободен печат – Методи Здравев

Низ градот нема ниту доволно функционални јавни чешмички на кои граѓаните можат да се разладат или да се напијат вода. Проблемот е присутен со години и за надлежните очигледно е тежок за решавање. Деновиве од граѓанската иницијатива „Шанса за Центар“ посочија дека, на пример, во Центар од 10 чешмички во надлежност на Општината, само три се функционални.

Шест се суви. Една тече под асфалт. Три „работат“, од кои две се прикрпени. Десеттата не ја најдовме. Од „Водовод и канализација“ ставиле водомери и општината треба да ги одржува и да ја плаќа водата. На 40 степени, 6 од нив се барут суви. Една тече од погрешно место, наместо да пијат луѓето, пие асфалтот – велат од „Шанса за Центар“.

Ништо подобро не е ниту со јавните чешмички што се во надлежност на другите општини или на јавното претпријатие.

ВИДЕО | Од 10 чешмички во надлежност на Центар, вода тече само од три

Јавниот градски превоз, пак, како што веќе е познато, е една од најтажните „приказни“ на главниот град. Само граѓаните што секојдневно го користат, можат да раскажат како изгледа враќањето од работа со автобус кога Скопје е зафатено од топлотен бран. Во повеќето автобуси нема клима, во голем број од нив нема ниту прозорци што се отвораат, па патниците се превезуваат како во вжештени конзерви. Во такви услови возачите работат по шест до осум часа дневно.

Не е полесно ниту чекањето на автобуските станици, каде што покривите се пластични и не нудат сенки.

Ужасно е, ужасно! Неклиматизирани автобуси, станици без сенка, нема човек кај да се засолни од жешково. Среќна сум кога ќе стигнам дома што ништо не ми се случило, но буквално секое чекање и качување во автобус е ризично за здравјето на секој човек, без разлика дали е млад или постар – вели жителка на Волково.

Во петок и сабота температурите ќе достигнат до 43 степени

И во вакви услови, освен препораките на Владата со кои треба да се ослободат од работни обврски бремените жени и лицата постари од 60 години и да се овозможува работа од дома, како и флексибилно и двократно работно време онаму каде што е изводливо, речиси нема друга помош за граѓаните во овие жешки денови. Но, препораките не се обврзувачки, па голем дел од фирмите не ги почитуваат.

Ниедна од општините во овој период не понудила никаква помош за граѓаните, барем да се обезбеди вода по улиците. Ова и не е за чудење во услови кога најголем дел од актуелните градоначалниците се предвреме влезени во предизборна кампања, па наместо да се посветат на сегашните потреби на граѓаните, ангажирани се со ветувања за идниот мандат.

Фото: Црвен крст на Град Скопје

Волонтерите на градскиот Црвен крст се единствените што летово се ангажирани на терен. Екипите составени од лекар или парамедик во изминатиот период патролираа низ централното градско подрачје, на поголемите автобуски постојки, пазари и здравствени установи и дистрибуираа вода, а им се мереше притисок на граѓаните кои имаа некакви на тегоби.

 Црвениот крст на град Скопје веќе втор месец како работи на терен со мобилни тимови што делат вода, вршат транспорт по потреба и даваат прва помош од топлотен удар – велат од организацијата.

На прашањето дали летово се презема зголемена грижа за бездомниците што се изложени надвор на екстремно високи температури, оттаму потврдно одговараат.

Пунктот за бездомници освен регуларните активности е приспособен на топлото време со тоа што е достапна услугата за одржување хигиена секој ден, а исто така има и тим што се грижи за лицата бездомници во најжешкиот дел од денот – посочуваат од Црвениот крст.

Во пунктот за бездомници во Момин Поток е отворена и телефонска линија 071/223-972 за дојави од страна на граѓани за бездомници што се погодени од топлотниот бран.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот