Пеколните температури го зголемија интензитетот на работа на Итната помош, во услови на ограничени ресурси. Во една смена има само 5-6 возила и исто толку медицински тимови кои се задолжени за целиот град и за многу различни видови интервенции меѓу кои и оние што не зависат од температурите –  сообраќајките.

Раководителката на службата за итна медицинска помош доктор Анита Димоска за „Слободен печат“ вели дека изминатиов летен период, покрај специфичните интервенции како влошувањето на состојбата на хронично болните на пример меѓу граѓаните доминираат колапсите на отворен простор.

-Покрај сообраќајните незгоди, незгодите со тротинети и велосипеди, повредените пешаци, со зголемувањето на температурите, забележуваме и влошување на здравствената состојба на граѓаните и колапси на јавно место. Во една смена има по 2-3 сообраќајки и 3-4 колапси на јавно место. Најчесто додека отидеме пациентите се веќе стабилизирани и освестени. Но, ако состојбата им е влошена и ако утврдиме дека не се работи само за обичен колапс, тогаш ги пренесуваме до ГОБ „8 Септември“, ни рече доктор Димоска.

Таа вели дека итната помош статистички располага со 5-6 екипи во смена, а смените траат по 12 часа.

-Во текот на едно деноноќие во просек има по 70 интервенции. Морам да напоменам дека се води строга селекција на телефон, заради малата екипираност и затоа што мораме да имаме слободно возило за сообраќајка или за итна интервенција. Многу водиме сметка, можеби и претеруваме со распрашување на телефон, но принудени сме тоа да го правиме, вели раководителката.

Нејзин лекарски совет за справување со горештините е да не се излегува од 11 до 17 часот на отворено, особено не на сончеви површини, да се бираат сенковити места и да се носи заштита на главата – чадор, капа, светла облека, очила за сонце, шише со вода.

-Рехидратацијата е најважна во овој момент, за да не дојде до пад на крвниот притисок. Исто така, граѓаните да избегнуваат мрсна храна, кофеински препарати и газирани пијалаци, да нанесуваат заштита на кожата, а бремените жени и лицата повозрасни од 60 години да ги следат препораките од Министерството за здравство, апелира доктор Димоска.

Во земјава зачестената појава на топлотни бранови во последните години, има значајни последици врз здравјето на населението, што предизвикува и зголемено оптоварување на здравствениот систем во целина.

Владата усвои препораки за заштита од топлотниот бран кој ја зафати земјава. Меѓу нив е и тоа работодавачите да обезбедат климатизирани простории со температура до 25 степени целзиусови. Некои од граѓаните сметаат дека оваа мерка е про-форма, зашто главниот проблем е излегувањето од работа – во најтоплото од климатизирана просторија на „пекол“.

-И да стигнеме некако на работа наутро, проблемот настанува после работното време, кога температурите се највисоки. Од климатизирана канцеларија, до дома е најтешкото. Голем шок за организмот, било да се работи за превоз со автомобил, или пак во несоодветниот автобуски јавен превоз, коментира читателка на „Слободен печат“. 

Друга препорака на владата е најтоплиот дел од денот граѓаните да го поминуваат во затворени разладени простории. Таа препорака е некомпатибилна со времето на напуштање на работното место за најголем дел од граѓаните – меѓу 15 и 17 часот, кога е најтопло.

Посебно треба да бидат внимателни хронично болните, лица постари од 60 години, бремените жени и помалите деца.

Меѓу мерките на владата се и тоа градежните работници да не работат од 11 до 17 часот, а во овој период хронично болните, лицата постари од 60 години и бремените жени да не излегуваат надвор и да не одат на работа ако нема климатизер на работното место. Забележливи се и екипите на Црвениот крст кои на различни локации во Скопје им делат шишиња вода на граѓаните кои се затекнати на автобуски постојки.  

Образовните установи и градинките се препорачува да избегнуваат активности на отворено во периодот од 11 до 17 часот.