Стари автобуси без соодветни еколошки стандарди, основно ниво на хигиена во автобусите и континуирано доцнење на автобуските постојки. Ова се само дел од причините кои градските власти ги наведуваат а кои како што велат, допринеле за раскинување на договорот помеѓу приватните автобуски превозници на „Макекспрес“ и ЈСП „Скопје“.

Од Град Скопје меѓу другото велат и дека Јавното Сообраќајно Претпријатие „Скопје“, откако го раскинало договорот со приватниот превозник „Макекспрес“,  на линиите на кои сообраќаа приватните автобуси, отсега ќе бидат заменети со автобуси на ЈСП „Скопје“ со што како што велат оттаму, транспортот на патници ќе продолжи непречено.

– Причина за раскинувањето на договорот со приватниот превозник „Макекспрес“ е непочитување на обврските од договорот во кои се уредуваат условите за начинот на јавен превоз. Со жалење мораме да констатираме дека „Макекспрес“ до моментот на раскинување на договорот не успеа да обезбеди модернизирани автобуси со соодветни еколошки стандарди, основно ниво на хигиена во автобусите и редовност без доцнење на автобуските постојки – велат од Град Скопје за „Слободен печат“.

Според градските власти, сите овие поплаки се истакнати од граѓаните, со што како што велат оттаму, во целост се нарушува и имиџот на јавниот превоз во главниот град.

– Уште еднаш потенцираме, транспортот на патници на линиите кои досега ги сервисираше „Макекспрес“ ги превзема ЈСП „Скопје“ со сопствени автобуси – велат од Град Скопје.