Славејќи го како „апостол на слободата за Бугарите во Македонија и Одринска Тракија“ денеска и во Бугарија се одбележуваат 153 години од раѓањето на Гоце Делчев.

Во Благоевград ќе биде положено цвеќе по повод 153-годишнината од раѓањето на македонскиот револуционер Гоце Делчев пред споменикот кој се наоѓа на плоштадот Македонија во градот.

Градот Гоце Делчев попладне во 17 часот ќе го чествува патронот со положување венци и цвеќе пред споменикот на револуционерот, а еден час претходно пред Домот на културата ќе има музика, песни и игри со младите таленти од Гоце Делчев, а во Домот на културата ќе се одржи концерт на Николина и Марија Чакардаков, објавија бугарските медиуми.

Годинава македонските и бугарските власти не се договорија за заедничко одбележување на годишнината на гробот на Гоце Делчев во црквата Свети Спас во Скопје, бидејќи според бугарскиот министер за надворешни работи Георг Георгиев, Бугарија не добила покана за заедничка прослава на овој ден, па традиционално, бугарскиот амбасадор во Скопје и дипломатите од мисијата ќе положат венци пред саркофагот на војводата во Скопје.

Моштите на Гоце Делчев се пренесени за време на Првата светска војна во Македонскиот научен институт во Софија. Во 1946 година, по наредба на владејачките комунисти во Бугарија во договор со Југославија, посмртните останки на војводата биле предадени на македонските власти во Скопје.

„Во Бугарија, Гоце Делчев е почитуван како револуционерен апостол на ВМОРО, етнички Бугарин и народен херој. Тој е продолжение на народноослободителните борби и комисиската работа, започната од апостолот на слободата Васил Левски. Во Северна Македонија, тие, исто така, го почитуваат Гоце Делчев додека го негираат неговото бугарско етничко потекло“, пишува Бугарското национално радио во најавата за чествувањата во Бугарија.

„Во 21 век Бугарија во неколку наврати и понуди на Северна Македонија заедничко славење на заедничките историски херои и настани на кои им се оддава почит во двете земји, вклучувајќи го и Гоце Делчев. Предлозите беа одбиени од Скопје со образложение дека ова го загрозува македонскиот идентитет“, објави БНР.

Во тензична атмосфера и под големо полициско обезбедување на 4 февруари 2023 година не се одржа заедничко чествување во Скопје на 151-годишнина од раѓањето на Гоце Делчев, туку бугарската делегација предводена од тогашниот бугарски вицепремиер и министер за внатрешни работи Иван Демерџиев положи венци одделно од неговиот тогашен колега Оливер Спасовски и македонската делегација. Бугарските медиуми тврдеа дека македонските власти на граница задржувале бугарски граѓани кои сакале да дојдат во Скопје да му оддадат почит на Гоце Делчев. Демерџиев тврдеше дека бугарските власти не им правеле никакви проблеми на македонските граѓани кои сакале да му оддадат почит на Гоце Делчев со положување цвеќе пред споменикот во Благоевград.

Во 2022 година по повод јубилејот 150 години од раѓањето на Гоце Делчев во Скопје пристигна тогашната министерка за надворешни работи Теодора Генчовска која  по македонската делегација положи венци на гробот во црквата Свети Спас во име на бугарската држава.

Заедничките чествувања на историски личности важни за двата народи, македонскиот и бугарскиот меѓудругото, се во наделжност за мешовитата македонско – бугарска комисија за историски и образовни прашања, формирана според Договорот за добрососедство меѓу Македонија и Бугарија потпишан во 2017 година, но членовите во 2018 усвоија само препорака за заедничко чествување на Св. Кирил и Методиј.

Одбележување на 153-годишнината од раѓањето на Гоце Делчев

.