Осум уапсени е првичниот биланс од дивеењето при прославата на Денот на албанското знаме, при што хулигани го сквернавеа македонското државно знаме во центарот на Скопје. Газењето, палењето и симнувањето на државниот симбол може да значи затвор од една до пет години за четворица насилници кои ќе се гонат за разгорување на национална, расна или верска омраза, раздор или нетрпеливост, поради сквернавење на државното знаме.

Премиерот Христијан Мицкоски порача дека ќе нема милост за никого и дека сите коишто го прекршиле законот и Уставот ќе одговараат, а за инцидентот прстот го впери во опозицијата. Сите релевантни партии го осудија сквернавењето на државниот симбол. Владејачките партии ја поздравија експресната интервенција на полицијата, додека опозициските обвинија дека полицијата затаила, зашто не ја превенирала ситуацијата и побараа оставка од министерот за внатрешни Панче Тошковски. ДУИ, пак, вина за запаленото државно знаме најде во интервенцијата на полицијата, додека за Вреди инцидентот е поради масовноста на прославата на албанското знаме.

– Уапсени се засега осум лица кои учествувале во вчерашните инциденти. Четворица од нив се сомничат согласно член 319 од Кривичниот законик, којшто се однесува на „предизвикување национална, расна и верска омраза, раздор и нетрпеливост“ за што е предвидена казна затвор од минимум една година. Сите се млади лица на возраст од 18 до 21 година, а еден од нив е малолетник. Тие се наоѓаат во полициска станица и по насока на јавен обвинител по итна постапка ќе бидат изнесени пред суд – рече Тошковски.

Тој додаде дека синоќа целосно расветлиле повеќе случаи, дел се решени делумно, а во голем дел од случаите полицијата ќе постапува и следните денови. Министерот повика сите кои имаат информации за завчерашните инциденти да ги достават до МВР и им се заблагодари на граѓаните кои на социјални мрежи споделиле видеа зашто еден настан е расветлен токму по добиена снимка од социјални мрежи.

Тошковски: Еден го симнал, друг го кинел, трет го палел

– Лицето кое го кине знамето е уапсено. Еден од нив е фатен како го пали македонското знаме, а еден како го симнува. Другите четири лица се уапсени затоа што учествувале во тепачка – рече Тошковски.

Министерот не смета дека полицијата затаила и не дејствувала превентивно, напротив полицијата одговорила професионално и соодветно, реагирала на лице место и ин флагранти (на дело) ги фатила лицата. Според него, среќа е што нема жртви, нема тешки телесни повреди и за среќа не се остварило посакуваното сценарио на некои недобронамерници да ја инволвираат полицијата во рамки на одредени настани на начин на кој тие сметале дека треба да биде инволвирана.

– Уште еднаш сакам да упатам порака до сите оние кои се на ум да предизвикаат какво било сценарио за дестабилизација на државата, жестоко и сурово ќе одговориме на ваквите обиди. Полицијата е спремна, зрела и професионална да одговори на сите предизвици – рече Тошковски.

Од Јавното обвинителство велат дека презема дејствија за расчистување на настанот со сквернавењето на македонското знаме на синоќешните прослави за Денот на албанското знаме.
Премиерот порача дека инцидентот е чин на агресија и рече дека Владата ќе одговори жестоко на сите провокации и обиди да се дестабилизира државата.

– Најостро го осудувам, тоа сепак претставува чин на агресија, нешто за коешто ние предупредувавме дека ќе се случува. Нема да биде изолиран случај, очекувајте дека ќе има и во иднина, бидејќи како правдата полека се доближува до криминалците, така тие ќе стануваат понервозни, понетрпеливи и единствениот начин да го одбранат криминално стекнатиот капитал е токму вака, со манипулирање и предизвикување ваков тип на инциденти – рече Мицкоски.

Тој додаде дека стратешките партнери и претставници на меѓународната заедница ги предупредиле дека ќе има инциденти на Денот на албанското знаме. Мицкоски и министерот за надворешни работи Тимчо Муцункски, пак, ним им ги доставиле сите докази.
Мицкоски за инцидентот ја обвини опозицијата.

– Овие криминални групи кои уште се длабоко во своето политичко мочуриште, а беа седум години на власт. Да не дозволиме да ја дестабилизираат нашата заедничка татковина Македонија. Апелирам до македонските граѓани на трезвеност, апелирам да не дозволиме овие инциденти да предизвикаат негативни чувства, бидејќи ова е една мала, изолирана и манипулирана група од оние кои ги штитат своите милиони. А тие кои се потенцијални жртви на овие политички криминалци и насилници, сакам да ги предупредам дека нема да има милост кон никого. Секој кој ќе го прекрши законот и Уставот ќе одговара – рече Мицкоски.

Од владејачката партија реагираат за, како што велат, навредливите скандирања и дивеења на неодговорни групи. Според ВМРО-ДПМНЕ, ваквите постапки имаат политичка заднина, а креаторите преку етнички теми и поделби сакаат да се наметнат во јавниот дискурс во отсуство на реална политичка понуда.

Опозициските СДСМ и Левица побараа оставка од Тошковски

– Јавноста очекуваше дека Тошковски на прес-конференцијата ќе си поднесе оставка и ќе ги разреши од функција директорот на БЈБ Александар Јанев, како и началникот на СВР Скопје Сашо Топаловски. Но ова не се случи. Денеска Тошковски, наместо одговорност, на прес-конференцијата рече дека полицијата одговорила соодветно и навремено. Ако било така, Тошковски треба да одговори: зошто МВР немаше навремени оперативни информации за да се делува превентивно и ова да не се дозволи? Што работат АНБ и БЈБ и како се дозволи да ескалира состојбата до ова ниво? Зошто дозволија ваков понижување на Македонците и македонската држава – праша Мартин Костовски, потпретседател на СДСМ.

Тој праша и зошто не се приведени тие коишто пукале и користеле огнено оружје.
Инцидентот се случил синоќа, во близина на Бит Пазар, откако претходно полицијата интервенирала поради блокирањето на сообраќајот во делови од градот, нешто што претходно не било најавено, како и поради употреба на огнено оружје за време на прославата.
Токму интервенцијата на полицијата за ДУИ е тригер за инцидентот.

– Остро ја осудуваме полициската интервенција без преседан за време на прославата на Денот на албанското знаме, ден кој има исклучително значење за Албанците. Оваа интервенција, наместо да го зачува јавниот ред, предизвика непотребни тензии и создаде клима на конфронтација, нарушувајќи го правото на граѓаните слободно да ја одбележат оваа значајна празнична традиција. Истовремено, го осудуваме индивидуалниот чин на палење на државното знаме како реакција на несоодветната интервенција на полицијата – велат од ДУИ.

Вреди, пак, за инцидентот ја обвини ДУИ.

– По досега невидената прослава на 28 ноември, додека албанската песна и оро одекнуваа низ целата земја, очигледно оваа празнична атмосфера не им одговараше на оние на кои им се наруши конфорот на фотелјите на власта. На крајот на денот се појавија овие кругови кои сакаат да ја дестабилизираат државата. Не затоа што ја сакаат државата, туку затоа што им недостига власта – смета Вреди.

Од владејачката ЗНАМ бараат одговорност за сторителите зашто „да газиш и кинеш, уништуваш знаме на држава која те израснала, образовала платила и плаќа, вложувала во тебе е злосторство против истата и треба да се одговара“.

Предвидени казни од една до пет, односно до 10 години затвор

Членот 319 од Кривичниот законик кој се однесува за предизвикување национална, расна и верска омраза, раздор и нетрпеливост вели дека тој што со присилба, малтретирање, загрозување на сигурноста, излагање на подбив на националните, етничките или верските симболи, со
оштетување туѓи предмети, со сквернавење споменици, гробови или на друг начин ќе предизвика или ќе разгори национална, расна или верска омраза, раздор или нетрпеливост, ќе се казни со затвор од една до пет години. Тој што делото од став 1 го врши со злоупотреба на положбата или на овластувањето или ако поради тие дела дошло до безредие и насилства
спрема луѓе или до имотна штета од големи размери, ќе се казни со затвор од една до десет години.