Главниот државен ревизор, Максим Ацевски, во емисијата „Бизнис21“ на ТВ „21“ рече дека надлежните институции не сакале да постапуваат по препораките на Државниот завод за ревизија.

Како што вели, се е алармантно во последните три извештаи.

„Постојано укажуваме за состојбите во делот на здравството. Постојано укажуваме за целите за одржлив развој меѓутоа очигледно дека или не сакаме или не знаеме да го направиме сето тоа. Ќе се надоврзам за една состојба во она што значи ковид пандемија, често пати ме прашуваат а зошто ни се случи тоа? Ни се случи тоа поради тоа што надлежните институции не сакаат да постапуваат на препораките од ДЗР“, вели Ацевски.

Според него, дури две третини од јавните здравствени установи се нефункционални и неодржливи односно не можат да обезбедат доволно средства за да бидат одржливи.

„Пример – Клиниката за дерматологија. Еве, јавно прашувам, набавени се неколку медицински апарати коишто стојат неупотребени, дадени се големи износи на средства, но поради непостапување на надлежното министерство и ФЗОМ за да ги одреди пакетите и цените, а тоа е во суштина давање одредено естетско разубавување на понежниот пол, не можат да се создадат доволно средства на клиниката“, вели Ацевски.

Тој вели дека скапи медицински апарати во многу здравствени установи „зјаат“ неупотребени.

„Не можам да поднесам, имаме акцелератори, дадени се милион и половина евра за еден акцелератор а тој да стои неупотребен поради тоа што не бил изграден објектот. Па чекајте, вие купувате мебел пред да ја изградите куќата или градите куќа, па купувате мебел?“, вели Ацевски.

Како што додава тој, ДЗР уште пред десет години имал извештај кој се однесува на подготвеноста на државата во услови на пандемија.

„Се што ни се случи за време на пандемијата, беше нотирано во конечниот ревизорски извештај на ДЗР. Ниту имаме доволно човечки ресурси, ниту имаме доволно опрема, ниту пак имаме доволно простор за карантин“, додава Ацевски.