Работна група од ЗЕЛС интензивно работи на проблематиката поврзана со измените на Законот за локална самоуправа околу можноста за отповикување градоначалник, а во наредниот период треба да се работи заедно со Министерството за локална самоуправа, но и да се вклучи во целиот процес и експертската јавност.

Според претседателот на ЗЕЛС и градоначалник на Општина Кисела Вода, Орце Ѓорѓиевски, не е доволно да се најде решение на краток рок, туку потребна е темелна реформа, за никој во иднина да не се соочуваа со проблем со каков што граѓаните на Скопје сега се соочуваат. Како што посочи Ѓорѓиевски состојбата е најалармантна во Скопје, а тоа била причина што поттикнала дискусија во ЗЕЛС, од која произлегол и предлогот за законски измени.

Ова не е лично мој предлог, туку предлог на на ЗЕЛС. Ние сме апсолутно свесни дека моќта на градоначалниците повторно се враќа во народот и така треба да функционира овој систем. Сега како градоначалници во многу општини се среќаваме со состојби со кои во 21 век решаваме проблеми како што се подземна инфраструктура. Тоа се проблеми кои некој не ги решил во минатото. Зошто не ги решил? Затоа што сите градоначалници вклучувајќи не и нас знаеме дека граѓаните се најголемиот суверен, ни ја даваат поддршката и потоа никој не може да не отповика доколку не функционира општината. На овој начин, градоначалникот кога ќе влезе во просториите на општината ќе знае дека како што ја добил поддршката од граѓаните, така тие исти граѓани, да можат да му го одземат мандатот – истакна Ѓорѓиевски во одговор на новинарско прашање пред почетокот на Генералното собрание на ЗЕЛС.

Тој смета дека никој не смее да се чувствува недопирлив, особено што локалните буџети се полнат од граѓаните. За тоа кој би бил начинот за отповикување, градоначалникот посочи дека лично смета дека тоа не би требало да се случува во рамките на Советот, затоа што тогаш би се оставил простор за манипулирање, за групирање, за злоупотреби и слично, туку постапката да биде во рацете на граѓаните, можеби преку референдум.

Во однос на воведувањето на комунална полиција, Ѓорѓиевски посочи дека веќе е изготвен предлог закон, но дека ЗЕЛС иницирал и промена на глобите кои сега се минимални од 50 до 200 евра, па се предлага, особено за оние кои создаваат диви депонии казната да се движи од 4 до 6 илјади евра, а да постои можност на стирителите да им се конфискува возилото.

Инаку, денеска се одржува седница на Генералното собрание на ЗЕЛС, на кое, како што посочи претседателот, се разговара за проблемите со кои се соочиле градоначалниците годинава, но и за плановите и предизвиците за наредната година.

Дел од разговорите ќе бидат насочени и кон унгарскиот кредит односно кон повикот којшто треба да се случи во февруари. Успешно го поминавме првиот повик како општини и доста средства добија општините по тој основ. Ќе разговараме и за законските пречки со кои се соочуваат општините, посочи Ѓорѓиевски.