Најдобрата македонска тенисерка Лина Ѓорческа го заврши својот настап на ИТФ турнирот во Куршумлијска Бања (Србија), откако денеска беше поразена од чешката тенисерка Ана Сискова со 2-0 во сетови (6-2, 7-6), во меч што траеше 84 минути.

Сискова од самиот почеток го наметна своето темпо и со два брзи брејка во првиот сет дојде до убедливо водство од 5-1. Ѓорческа успеа да врати еден брејк, но Чешката тенисерка не дозволи пресврт и со нов брејк го затвори сетот со 6-2.

Во вториот сет, Ѓорческа заигра поагресивно и стигна до предност од 4-1, но Сискова со два брејка се врати и израмни на 5-5. Сетот беше решен во тај-брејк, каде чешката тенисерка покажа поголема стабилност и со три мини-брејка го доби со 7-2.

И покрај елиминацијата, Ѓорческа нема многу време за одмор. Веќе следната недела ќе има нова шанса за резултат на истиот терен, каде ќе настапи на нов фјучерс турнир во Куршумлијска Бања.