Европската Унија ќе го одложи до средината на април воведувањето на царинските контрамерки против Соединетите Американски Држави, кои беа најавени на 12 март, соопшти денеска портпаролот на Европската комисија, Олоф Гил.

Одлуката е одговор на царините од 25 отсто што ги воведе американскиот претседател Доналд Трамп за челик и алуминиум, објави Фигаро.

Гил објасни дека тоа ќе овозможи повеќе време за преговори со американската администрација. Истиот ден кога стапија на сила американските царини за челик и алуминиум, Европската Унија на почетокот на април објави пропорционални тарифи за низа производи увезени од САД, како што се чамци, мотоцикли и бурбон, во вредност од 4,5 милијарди евра.

Царините на Трамп ја поттикнаа Европската комисија да предложи повторно воведување тарифи за американските производи почнувајќи од 1 април, како и да донесе уште еден сет тарифи во вредност од 18 милијарди евра од 13 април, пренесува Ројтерс.

Како што изјави претходно европскиот комесар за трговија, Марос Шефчович, Европската Унија размислува за „хармонизирање на два сета на контрамерки“, што ќе обезбеди дополнително време за консултации со земјите членки и преговори со САД, објави Политика.

Италијанската премиерка Џорџа Мелони во вторникот ги предупреди партнерите од Европската Унија за можна ескалација на трговскиот спор со владата во Вашингтон. Францускиот премиер Франсоа Бајру изјави во неделата дека Европската Унија „најверојатно направила грешка“ кога предложила воведување царини за американското виски, пренесува Танјуг.