Парите на Роман Абрамович, рускиот бизнисмен близок до Владимир Путин, биле инвестирани во најмалку пет германски компании, покажаа доверливите документи на кипарската компанија за управување со имот МеритСервус, кои го опфаќаат периодот од 2004 до 2022 година. Рускиот олигарх, според овие документи, бил клиент на кипарската компанија барем до крајот на март 2022 година, пишува Дојче веле.

Од средината на 2022 година, Абрамович е на списокот на лица против кои се воведени санкции од Европската унија, што значи дека неговите пари вложени во Европа треба да бидат замрзнати. МеритСервус од април годинава се нашол и на листата на санкционирани компании, на која ја ставила и Велика Британија. Одлуката е образложена со тоа што компанијата работела за Абрамович.

Горенаведените документи се само дел од околу 400.000 документи кои протекле од МеритСервус и кои германскиот јавен сервис СВР ги добил на увид од американската организација за транспарентност ДДОС-Сикретс. Истражувачкиот тим на СВР со месеци ги анализирал добиените документи кои содржеле список со имиња на повеќе од 2.500 клиенти, мејлови, нотарски документи, копии од пасоши и банкарски документи.

Дополнително, извадоци од германскиот трговски регистар укажале дека и покрај санкциите, Абрамович можел да има акции во најмалку три германски софтверски компании.

Откако Русија го започна нападот врз Украина пред 16 месеци, истражителите ширум светот се обидувале да го откријат имотот на руските олигарси, кои се сметаат за дел од рускиот моќен апарат. Овие истраги често биле неуспешни.

Експертите се жалат дека често само со помош на документи кои протекуваат во јавноста преку кодошите може да се откријат скриените средства, бидејќи во спротивно основни информации за вистинскиот идентитет на сопственикот на компанијата не се достапни. „Финансискиот пазар сè уште е еден вид црна кутија“, вели експертот за перење пари Кристоф Траутветер. Тој објаснува дека токму поради тоа нема никаква корист од многуте санкции.

Така, до сега за јавноста беше непознато дека парите на Абрамович завршиле во Берлин, каде што има седиште Aуто1, стартап кој се рекламира како најголема онлајн платформа за трговија со автомобили во Европа. Таа компанија вреди милијарди. Во 2020 година, офшор компанијата Ервингтон, во целосна сопственост на Абрамович, имала акции во овој стартап. Ова произлегува од листата на сопственици на акции на компанијата Ауто1.

Од протечените документи на МеритСервус, се чини дека Абрамович инвестирал и во други берлински стартапи. На пример, во глобалната медиумска компанија Шоухирос. Парите ги добил исто како Ауто1, преку офшор компанија наречена Инес Ворлдвајд Холдингс. Во писмото од 2019 година, видено од СВР, еден од шефовите на МеритСервус му рекол на основачот на Шоухирос дека „Абрамович е последниот корисник на Инес Ворлдвајд Холдингс“.

Компанијата на Абрамович купила акции во три други помали стартапи кои се специјализирани за апликации.

Компанија која постојано се појавува во врска со инвестициите на Абрамович е инвестицискиот фонд Таргет Глобал, кој е основан во Москва пред десет години, а сега е со седиште во Берлин. Овој фонд се рекламира како инвеститор во повеќе од 100 стартапи во Германија, меѓу кои е и Ауто1. Од кипарските документи е очигледно дека во 2020 година рускиот олигарх дал заем од 15 милиони долари на подружница на Таргет Глобал во целосна сопственост.

Претставник на стартапот Ауто1 потврдил дека „Таргет компани“ инвестирале во Ауто1. Но: „Тоа беше многу години пред првите санкции“. Тие додале дека во меѓувреме има само „ограничено знаење“ за сопствениците на акциите, бидејќи оваа компанија котира на берзата од февруари 2021 година. На една листа на сопственици на акции во овој стартап од 2021 година, меѓу 35-те акционери има седум чии имиња го вклучуваат зборот „Таргет“. А во кипарските документи кои СВР ги погледна, како „партија“ се споменува компанијата на Абрамович, Ервингтон заедно со компаниите Таргет.

Кристијан Траутветер смета дека за спроведување на санкциите е проблематично тоа што името на сопственикот мора да биде запишано во регистарот само доколку поседува повеќе од три отсто од акциите. „Малцинските удели во милиони не ни треба да се декларираат. Затоа е многу веројатно руските олигарси сè уште да имаат непознати удели во германските компании. А тоа дури и не би било нелегално“, вели овој експерт.

Себастијан Фидлер, претставник на Социјалдемократската партија на Германија (СПД) во Бундестагот и партиски експерт за проблемот со перење пари, не беше изненаден од резултатите од овие истражувања на СВР. „Протечените документи покажуваат колку се важни тајните финансиски места за руските олигарси да инвестираат пари во германски компании“, вели тој и бара не само забрана за користење на одредени форми на капитал од Британските Девствени Острови или Кајманските Острови, туку и казни ако не е веднаш на прв поглед се гледа што на кого му припаѓа.

Минатата недела министрите за правда на земјите-членки на ЕУ се договорија за казнување на кршењето на санкциите. Ова треба да важи и за луѓето кои имаат деловни односи со одредени компании. „Многу членки на ЕУ беа мизерно обучени да применуваат санкции“, вели Фидлер. Затоа бара проширување на надлежноста на Европското јавно обвинителство.