Како одговор на навлегувањето на руските беспилотни летала во полскиот воздушен простор, германската Социјалдемократска партија (СПД) повикува на засилување на капацитетите на воздушната одбрана на вооружените сили на земјата, јавува ДПА.

 „Нашите капацитети за воздушна одбрана итно треба да се прошират“, изјави заменик-претседателката на групата, Сиемтје Мелер, за Funke Media Group, во коментари објавени денеска.

Покрај надополнувањето на системите Патриот и Ирис-Т, што претходно беа префрлени во Украина, Мелер ја нагласи потребата од значително повеќе мобилни системи за воздушна одбрана „Skyrangers“, што се монтираат на возила.

 „Осумнаесетте единици што во моментов се нарачани се далеку од доволни“, рече Мелер, пренесена од германската агенција. Началникот на германската армија, генерал-потполковник Алфонс Мајс, неодамна ја опиша ограничената способност на Германија да се спротивстави на беспилотните летала како нејзина најголема слабост, повикувајќи на максимални напори за зајакнување на одбраната од беспилотни летала, потсети ДПА.

За време на руски воздушен напад врз Украина во средата, голем број беспилотни летала влегоа во полскиот воздушен простор, а со тоа и на територијата на НАТО.

Полските воздухопловни сили, поддржани од сојузниците на НАТО, за првпат соборија неколку беспилотни летала. Германија вчера објави дека ќе ги зајакне своите воздушни патроли на источното крило на НАТО, а Франција исто така ќе испрати авиони за заштита, потсетува ДПА