Герапетритис: Грчката влада нема да покаже никаква толеранција по прашањето на Договорот од Преспа
Шефот на грчката дипломатија Јоргос Герапетритис во интервју за грчкото радио Realfm 97.8 се осврна на надворешната политика на земјата во однос на соседите Северна Македонија, Албанија и Турција нарекувајќи ја „одговорна“ откако владејачката партија во Грција беше прозвана дека не реагира на „прекршувањето на Преспанскиот договор“ и се повикуваше и на грчко вето на пристапните преговори на Македонија во ЕУ, покрај постоечкото бугарско вето.
Препорачано
-Ова е меѓународен договор кој мора да се применува неумоливо и без никаква диференцијација. Сегашната власт како опозиција и јас имавме негативен став за Договорот од Преспа. Мислам дека има сериозни правни и правно-политички прашања. Сепак, тоа е меѓународен договор кој има приоритет над законите, не може да се менува еднострано и создава меѓународни обврски. Јасно е дека двете страни мора да го почитуваат. Од наша страна тоа секогаш се набљудува со добра волја. За жал, по изборите во Северна Македонија имавме реторика која отстапи. Грчката влада нема да покаже никаква толеранција по ова прашање. Имаше сериозни отстапки за обезбедување на прилично сложеното име. Ќе останеме приврзани за ова прашање и ќе го поддржиме неговото спроведување на секој начин, во спротивно секако ќе има последици, рече грчкиот министер за надворешни работи.
Запрашан за коментар за тоа како се развиваат грчките односи со Албанија и со Северна Македонија, тој рече:
-Ние практикуваме одговорна политика и разбирам дека и на овие полиња има некои кои би сакале да имаме агресивна реторика и да преземаме агресивни акции. Сакам да кажам дека националниот долг е да се грижиме за нашите права на начин што и служи на нашата национална линија. Навистина имаше предизвици од Албанија и особено по општинските избори во Химара. Го интернационализиравме прашањето, го заштитивме малцинството, го ставивме малцинството во срцето на ЕУ на два начина: првиот е изборот на Белерис во Европскиот парламент и со негово учество во Комисијата за напредок на Албанија на патот кон ЕУ и второ, прашањето за заштитата на грчкото национално малцинство и прашањето за заштитата на имотните прашања на грчките иселеници станаа заеднички став на 27-те земји членки на ЕУ“, рече Герапетритис.
