Љупчо Георгиевски, претседателот на избришаниот бугарски културен клуб „Иван Михаилов“ од Битола во емисија на бугарската телевија откри дека Бугарите во Битола преку новорегистрираната невладина организација „Една роза“ имаат намера да презентираат книги и го проучуваат нивното културно и историско наследство, па почнаа со Чернодрински и култната драма „Македонска крвава свадба“.

„Иако се жалиме на бришењето на клубот и знаеме дека законот е репресивен, ние го почитуваме, а нашите права ги бараме во судот во Република Северна Македонија, а потоа ќе ги бараме и во судот во Стразбур, рече Георгиевски во емисијата „Брисел 1“.

Тој ја отцени како лажна неодамнешната пријава до обвинителството дека бугарскиот клуб во Битола работи и покрај неговото бришење која ја покрена потпретседателката на македонското собрание Весна Бендевска. Таа претходно како претседателка на Комисијата за заштита од дискриминација го иницираше бришењето на клубот „Иван Михаилов“ од Централниот регистер . Георгиевски тврди дека е пред нова пријава врз основа на лажна изјава на службено лице.

„Направивме презентација на фототипското издание на книгата „Македонска крвава свадба“, каде беа прочитани извадоци во кои хероината на прашањето што е, вели дека била Бугарка. Ако во Северна Македонија на глас читаме вакви пишувања на нашите преродбеници, кои се слават во двете земји, ни се закануваат на суд за говор на омраза, ксенофобија итн.“, изјави Георгиевски и за Бугарија ON AIR.

Бендевска настанот во бугарскиот клуб што се случи пред денот на ослободувањето на Битола, го оцени како провокацијата од страна на непостоечкото здружение, поврзана со тврдењата искажани на настан во клубот „Иван Михаилов“, во кои се посочува дека Војдан Чернодрински е бугарски преродбеник, а „Македонска крвава свадба“ дека е дел од бугарското културно наследство.

– Се обратив до Основното јавно обвинителство во Битола за да прашам дали државните институции можат да најдат начин на кој ќе го забранат дејствувањето на здружението на граѓани со фашистичко име. Доколку има индиции, веднаш ќе поднесам кривична пријава против Љупчо Ѓоргиевски, поранешен претседател на поранешното здружение што е избришано од регистарот – изјави Бендевска пред две недели.

Георгиевски во гостувањето во Софија ја коментираше својата изјава дадена при затворањето на клуб пред една година дека „Ние сме избршани, но не сме победени“.

„Една година подоцна, сакам да кажам дека владите на РСМ не можат да разберат дека клубот „Иван Михаилов“ го нема во централните регистри и во клубовите во Битола. Тоа е во срцата на секој македонски Бугарин и секој македонски Бугарин гордо го носи името на „Иван Михаилов“, заклучи тој.

Инаку бугарскиот културен центар „Иван Михаилов“ од Битола беше избришан од Централниот регистар во март минатата година по одлуката на тогашниот министер за правда Кренар Лога донесена врз основа на добиеното негативно мислење од Комисијата за употреба на имиња на личности. Оваа комисија се изјасни дека „именувањето на здружението Иван Михајлов е провокација за националните чувства на македонскиот народ имајќи предвид дека се работи за личност блиска со фашистичка идеологија кој со своето дејствување ја негирал посебноста на македонскиот народ, а истовремено предизвикува нетрпеливост, нетолеранција и омраза во македонското општество“.