Рускиот гасен гигант „Газпром“ денес објави дека нето добивката на компанијата во 2024 година што им се припишува на акционерите изнесува околу 15 милијарди долари. „Газпром“ регистрираше загуба од околу 7,7 милијарди долари една година претходно, објави „Тас“, пренесува Политика.

Руската компанија наведува дека профитот е значително поттикнат од намалувањето на негативните курсни разлики за обврските во странска валута.

„Дополнително, на овој исход влијаеше и зголемувањето на приходите од камати од готовинските инвестиции, што го компензираше трошокот за вкупно зголемување на нето приходите од камати од околу 17,5 милијарди долари, што е двојно повеќе од бројката за 2023 година“, рече заменик-генералниот директор на Газпром, Фамил Садигов.

Приходите на руската холдинг компанија пораснаа за 25 проценти, на околу 130,9 милијарди долари, што е втор највисок резултат во историјата на компанијата.