Автобускиот превоз во Скопје е нередовен, а патниците секојдневно доцнат на работа поради лошата организација на транспортот во главниот грда. Некои автобуски линии се сосема укинати, а другите се минимални и не можат да ги задоволат потребите на граѓаните. Вработените добиваат опомени пред отказ, студентите ги чекаат професорите, пациентите чекаат на лекарите… Патувањето од еден час понекогаш се претвора во патување од два часа, се жалат продавачки, медицински сестри, службеници од главниот град, кои почнаа да добиваат закани од раководителите и газдите, дека ќе „летаат“ од работа ако продолжат да доцнат.
Од ССМ и од Државниот трудов инспекторат порачуваат дека газдите не смеат да отпуштаат работници поради доцнење.

– Отказ не смее да се дава за такво нешто. Доцнењето е само повреда на работниот ред и дисциплина, а работодавачот е должен прво писмено да го извести работникот и да му даде рок од 15 дена да го подобри односот. Во секој случај, сè зависи од оној што ја води институцијата или компанијата, но за актуелната проблематика за која се интересирате, кога работникот не може да стаса навреме, но не поради своја вина, мора да има флексибилност. Од друга страна, доцнењето не смее да прејде во навика или да биде намерно – објаснува Весна Томовска, директорка на Државниот трудов инспекторат, за „Слободен печат“.

Дел од правниците велат дека газдата или работодавачот е должен во предупредувањето да ја наведе причината за давање отказ, односно да објасни која обврска/дисциплина ја повредил вработениот и каде е пропишана таа одредба, фактот (на кој начин, кога и каде е извршена повредата), како и доказ за констатираната повреда.
Трпе Деаноски, претседател на Синдикатот на УПОЗ, за нашиот весник коментира дека газдите и работодавачите го користат проблемот со автобускиот превоз да вршат притисок врз вработените, но не смеат да се закануваат со отказ. Тој советува дека ако вработените се најдат во таква ситуација, задолжително да го известат нивниот претпоставен со порака и да ја чуваат како доказ дека не доцнат намерно.

– Кај нема вработени, па уште да им се закануваат. Ова се само форми на притисок. Ако газдите се толку загрижени и сакаат да помогнат, тогаш нека им обезбедат превоз на вработените, а не да ги караат или да ги отпуштаат– додава Деаноски.

Според член 33 став 1 од Законот за работни односи, работникот е должен да го известува работодавачот за суштинските околности кои влијаат, односно би можеле да влијаат врз исполнувањето на неговите договорни обврски. Во членот 82, став 1, стои дека работодавачот може на работникот да му го откаже договорот за вработување без отказен рок во случаите на кршење на работниот ред и дисциплина или неисполнување на работните обврски утврдени со овој или друг закон, колективен договор, правилата за работниот ред и дисциплина и договорот за вработување, а особено ако работникот неоправдано изостане од работа три последователни работни дена или пет работни дена во текот на една година.
Жителите на Скопје се едни од најнезадоволните корисници на јавен транспорт во Европа, покажа најновата анализа на Евроњуз. Со 53 отсто незадоволни патници, главниот град на Македонија е меѓу најслабо рангираните во однос на јавниот превоз. Недоволната достапност, лошата организација и доцнењата се главните фактори што придонесуваат за ова незадоволство.