Како одговор на летот на руски беспилотни летала над територијата на Полска, членка на НАТО и ЕУ, Германија ќе го зголеми својот ангажман на источната граница на НАТО, објави владиниот портпарол Стефан Корнелиус.

„Германската влада ќе го прошири воздушниот надзор над Полска покрај постојните обврски во балтичките држави и Полска“, рече тој, според Шпигел.

Тој додаде дека германската влада ќе ја интензивира својата поддршка за Украина и „ќе работи на брзо усвојување на силниот 19-ти пакет санкции“ во рамките на Европската Унија.

Според соопштението од Сојузното министерство за одбрана, Бундесверот ја продолжува и интензивира тековната мисија во која два борбени авиони „Еурофајтер“ стационирани на аеродромот Росток-Лаге, исто така, ќе учествуваат во надзорот на воздушниот простор над Полска, познато во жаргонот на НАТО како „воздушна полиција“.

Се очекува оваа мисија да трае најмалку до крајот на годината.

Покрај тоа, воздухопловните сили распоредуваат втора ескадрила за тревога и соодветни екипажи во Лаге, така што четири авиони ќе учествуваат во надзор на воздушниот простор на источното крило на НАТО во иднина.

Целта на воздушната полиција е да се зачува интегритетот на воздушниот простор на НАТО и можноста за сеопфатно и флексибилно реагирање на потенцијални закани.

Според германскиот весник, НАТО го усвои овој концепт како одговор на руската анексија на Крим во 2014 година.

„Германските Eurofighters ќе полетаат во случај на сомневање за да идентификуваат непознати или сомнителни авиони и, доколку е потребно, да ги пресретнат. Воздухопловните сили веднаш ќе воспостават оперативна подготвеност“, објави Министерството за одбрана.

До почетокот на септември, германските воздухопловни сили стационираа пет Eurofighters во Полска за мисии на воздушно набљудување.
Сојузниците на НАТО се менуваат во обезбедувањето поддршка на државите на источното крило.

Дополнително, германските вооружени сили моментално имаат два системи за воздушна одбрана Patriot стационирани на аеродромот Жешов.
Голем дел од западните испораки на оружје и друга воена опрема за Украина се вршат преку овој град во југоисточна Полска.

Контингентот се состои од приближно 200 војници и 100 возила, пишува „Шпигел“.

Германскиот министер за надворешни работи Јохан Вадефул во средата изјави дека нелегалното влегување на руски беспилотни летала во полскиот воздушен простор за време на нападот врз Украина покажува дека Москва е подготвена да го ескалира конфликтот, поради што НАТО мора да биде обединет и мора да следи одговор.

Полските власти вчера објавија дека собориле неколку руски беспилотни летала што го нападнале полскиот воздушен простор.

Европските претставници изјавија дека станува збор за намерен руски упад.