Фудбалската репрезентација на Македонија до 21 година одигра нерешено 2:2 против Словачка во рамките на второто коло од меѓународниот турнир „Анталија Куп 2021″.

Нашите фудбалери пропуштија победа, имаа предност убедлива од 2:0, но противникот успеа да се врати во игра и да го изедначи резултатот. Македонија одлично го започна натпреварот, добрата игра ја крунисавме со погодок во 24 минута. Стрелец на голот беше Чурлинов. До крајот на првиот дел уште неколку добри можности за тимот на Благоја Милевски, меѓутоа без реализација. Како што го завршија првото полувреме, нашите фудбалери во ист ритам го започнаа и вториот дел. Во 54 минута сосема заслужено преку Радуловиќ Величковиќ Македонија поведе до 2:0. Но, во продолжението следуваше голем пад во играта и тоа го искористи противникот кој прво во 76. минута ја намали предноста, а во 89. автогол си постигна Радуловиќ Величковиќ за конечни 2:2.