Агент на украинската служба за безбедност (СБУ), кој подготвувал напад врз воениот аеродром во Енгелс, е уапсен во Волгоград, соопшти денес Центарот за односи со јавноста на руската служба за безбедност ФСБ.

„ФСБ спречила нелегална активност на 35-годишен жител на Волгоград, кој е осомничен за соработка со претставници на странски разузнавачки служби“, се вели во соопштението, објави РИА Новости.

Според извештаите, осомничениот живеел во регионот Лавов од 2019 до 2022 година, каде што бил регрутиран од СБУ, а во замена за украинско државјанство, требало да изврши саботажа во Русија.

Напаѓачот бил обучен во Киев, а пристигнал во Волгоград под изговор дека сакал да се врати дома.

Потоа отишол во Саратов, каде што изнајмил стан, и требало да инсталира опрема за беспилотни летала што ќе се користат во нападот на воениот аеродром во Енгелс, според руската агенција.

Претставувајќи се како курир, требало да добие средства за организирање саботажа, а членовите на ФСБ го уапсиле во таа прилика.

Против него е отворена истрага по обвинение за разузнавачка соработка со странска држава.