Во периодот од јануари до април годинава Фронтекс забележал само едно нелегално преминување на македонската државна граница, од правец на Албанија кон Грција. Европската агенција напоменува дека презентираните податоци се однесуваат на откривање на нелегално преминување на границата, а не на бројот на лица, бидејќи едно исто лице може неколку пати да ја премине надворешната граница.

Сепак, во моментов не постои систем на ЕУ што може да ги следи движењата на секое лице по илегален премин на граница. Според тоа, не е можно да се утврди точниот број на лица кои илегално ја преминале надворешната граница.

Од април минатата година Фронтекс заедно со македонската граничка полиција патролира долж државната граница.

Последниот извештај на Фронтекс покажува дека „западнобалканската рута“ забележала најголем пад на илегални преминувања на мигранти кон земјите од Европската унија, за околу 69%, за првите четири месеци од годинава, во споредба со истиот период пред една година.

Според извештајот објавен во средата од Агенцијата за гранична контрола на Европската унија, Фронтекс, „западнобалканската рута“ препознала околу 7 илјади нелегални преминувања од почетокот на јануари до крајот на март, што за нив претставува најголем пад меѓу главните миграциски рути во Европската унија.

Според податоците на оваа агенција, илегалните мигранти од Сирија, Турција и Авганистан го сочинуваат најголемиот број лица кои се идентификувани на рутата низ Западен Балкан.

Според истражувачите за имиграција, дури и кога илегалните мигранти бараат азил, тие немаат намера да останат во балканските земји, туку ја користат оваа практика за да добијат време и да најдат можности да се преселат во европските земји.

Огромното мнозинство на илегални мигранти, поради јазичните потешкотии, слабите економии на балканските земји, не успеваат да се интегрираат на пазарот на трудот.

-Самите земји од Балканот се значително погодени од иселувањето на нивните жители, а во последно време во многу области, особено во туристичките области, потребата од работна сила е зголемена. Многу претпријатија во Албанија не успеаја да привлечат работна сила од Бангладеш, Индија, Пакистан или други земји со договори, бидејќи многу случаи докажаа дека по краток престој од само неколку месеци работниците си заминале, објави Гласот на Америка на албански јазик.

Во април годинава, Специјалното обвинителство и полицијата открија во Албанија шема на меѓународен шверц на вработени од Бангладеш.

По едногодишна истрага, откриено е дека преку корупција на полицајци, агенции за посредување и фиктивни договори за вработување, доаѓале работници главно од Бангладеш во Албанија и потоа транзитирале во земјите од Европската унија во замена за 5 илјади евра за секој работник.

Албанското Специјално обвинителство (СПАК) соопшти дека од спроведените истраги во соработка со Специјалното обвинителство на Република Косово, одредени се безбедносни мерки за 26 лица, осомничени дека се вмешани во шверцерската организација, од кои 21 останале во затвор.