Фреди Белери, поранешниот етнички грчки градоначалник на Химарa, изрази измешани емоции откако албанскиот суд го одобри неговото условно ослободување, прнесува „Катимерини“. 

„Ослободен сум, но не можам да ја заборавам неправдата што ми беше направена и бесрамното непочитување на волјата на народот на Химарa“, изјави Белери за јавната телевизија ЕРТ, нарекувајќи ја ситуацијата „државен удар“ од албанските власти.

Белери, кој беше уапсен пред општинските избори во мај 2023 година под обвинение за купување гласови, вети дека ќе ја продолжи својата правна битка низ сите нивоа на албанската правда и, доколку е потребно, пред Европскиот суд за човекови права во Стразбур.

„Оваа одлука беше неправедна и завера што мора да се разоткрие, без разлика колку време е потребно“, рече тој.

По неговиот неодамнешен избор во Европскиот парламент со грчката конзервативна партија, Белери планира да се пресели во Брисел по кратката посета со семејството и присуството на Меѓународниот саем во Солун.