Кошаркарската репрезентација на Франција доби сериозен удар во пресрет на елиминационата фаза од Евробаскетот, Алекс Сар, еден од најважните играчи во репрезентцијата го заврши турнирот поради повреда.

Перспективниот НБА кошаркар се повреди на натпреварот против Словенија, а деталните лекарски прегледи потврдија дека станува збор за повреда на листот, која ќе го оддалечи од паркетот најмалку неколку недели. Со тоа, неговото учество на континенталниот собир заврши предвреме.

Оваа вест дополнително ја комплицира ситуацијата на Французите, кои сè повеќе се соочуваат со кадровски проблеми. Сар е само уште едно име на веќе предолгата листа на повредени ѕвезди на Евробаскетот. На неа веќе се наоѓаат и Богдан Богдановиќ (Србија), Рокас Јокубаитис (Литванија), Јоханес Војтман (Германија), Андрејс Гражулис (Летонија) и Сим-Сандер Вене (Естонија).

Недостигот на клучни играчи во завршницата од шампионатот сигурно ќе го промени текот во борбата за медали, а селекторите ќе мора да бараат нови решенија во најважниот дел од турнирот.