Како дел од новата иницијатива, француските граѓани кои облеката и обувките ќе ги однесат кај овластени кројачи и чевлари, ќе имаат право на враќање на одреден дел од парите – од 6 до 25 евра, во зависност на сложеноста на работата и ткаенината, пишува Клима 101.

Според медиумите, локалните власти во следните пет години ќе исплатат бонуси од фондот за одржливост во вредност од 154 милиони евра, со надеж дека потфатот ќе може да продолжи и во иднина. Сите кројачи и чевлари во Франција можат да се пријават на програмата целосно бесплатно, а се верува дека учеството ќе резултира со зголемување на нивниот бизнис.

Целта на воведувањето на бонусот за поправка е да се намали количината на текстилен отпад, која во Франција моментално се проценува на 700 илјади тони годишно. Но, ова е само дел од посложената, глобална слика: секоја секунда камион со облека се фрла на депониите ширум светот. Згора на тоа, модната индустрија произведува повеќе штетни емисии отколку авијацијата и поморскиот транспорт заедно.

Сето ова се јасни показатели дека во ерата на брзата мода треба да се забави непромислениот консумеризам. Поправките по примерот на Французите се само еден од начините – дел од решението е и купувањето користени работи, што, судејќи според растот на пазарот на половни производи, е се попривлечно за потрошувачите.