Бројот на инциденти против христијаните во Франција се зголемува, а само во првите пет месеци од оваа година се регистрирани 322 такви случаи, предупреди група француски сенатори во колумна објавена на веб-страницата на „Булевар Волтер“.

Како што изјавија 86 сенатори, ова е зголемување од 13 проценти во споредба со истиот период претходната година , објави париски „Фигаро“.

„Бројот на кражби на црковни предмети е во пораст веќе три години , па така во 2024 година се регистрирани 820 случаи, додека тој број изнесувал 633 во 2022 година “, изјавија сенаторите, претежно од редовите на либерално-конзервативната партија Републиканци.

Тие истакнаа дека речиси секоја недела во регионалниот дневен печат или на социјалните мрежи има извештаи за вакви инциденти, од богохулство до палење или напади врз физичкиот интегритет на поединци.

Група сенатори изразија жалење за овие настани, наведувајќи два инцидента како примери за нееднаков третман. Како што наведоа, додека инцидентот со оставените свински глави пред неколку џамии во Париз предизвика силни реакции во политичките кругови и значително медиумско внимание, палењето на статуата на Богородица во црквата во Генгам, на почетокот на септември, за време на празничната миса, не наиде на слична мобилизација на јавноста или медиумско известување.

„Христијаните во Франција честопати се чувствуваат напуштени“, истакнаа сенаторите и ја повикаа владата да дејствува без одлагање.

Тие додадоа дека постои итна потреба од воспоставување национален систем за пријавување и поддршка на жртвите на антихристијански инциденти, кој би бил достапен, ефикасен и разбирлив за граѓаните , со цел да се гарантира слободата на изразување на религиозните чувства за сите француски граѓани.

Владата сè уште не се огласила во врска со овие апели од групата сенатори, објави „Фигаро“.