Добре Ѓорѓески од тетовското село Долно Седларце е еден од многуте кои останаа без земјоделски род откако минатата недела невремето во Полошко „покоси“ голем дел од земјоделските засадени површини.

Го затекнавме на тетовскиот зелен пазар како продава од тоа што успеал да го заштити. По некоја гајба сливи, јаболка и малку зеленчук. „Останатото е паднато на земја и уништено од градот и поројниот дожд“, вели Добре.

„45 минути врнеше град. Да видиме господ што остаел тоа ќе собереме, над 70 % е уништено. Имав на два декари сливи, сè тоа е на земја, имам засадено и домат, пипер, грав, сè е уништено, катасторфа,“ вели Ѓорѓески.

Од општините од Полошко каде што имаше навреме најавија обесштетување, но Ѓорѓески не се надева многу на, како што вели, државни пари.

„И пред две години фати невреме и направи штета, Господ дава, Господ зема. Беше невидено невреме. Тешко и со тоа обесштетување да се покријат трошоците. Еднаш имав штети од едно невреме, дојдоа од комисија да видат и еве до ден денес не добив ниту денар од тоа“, вели Ѓорѓески.

Поради ваквата состојба, додава тој, многу земјоделци се откажуваат од дејноста, а пред сè и поради фактот што за речиси сите земјоделски производи нема гарантиран откуп.

„Од сточарството речиси сите се откажаа. Државата не мисли на нас. Кој сее, сее, но сè помалку се занимаваат со земјоделие. Државата треба да преземе мерки за земјоделецот, оти немаме извоз, нема систем за наводнување, а за да ја осигураме нивата имаме мали парцели, не ни се исплаќа“, вели Ѓорѓески.

Од Општина Тетово пак велат дека сите без исклучок ќе бидат обесштени, ако за тоа приложат соодветна документација и доказ.

„Досега до Општина Тетово има пристагнато околу 160 барања за обесштетување од невремето во Тетовско минатата недела. Најголем дел од барањата се за земјоделско земјиште. Десетина барања има за штети врз приватен имот, односно домови, и пет за автомобили. Инаку, штетите на возилата не ги покрива Општина Тетово, туку осигурувањето на возилото. Во однос на штетите на земјоделското земјиште, обесштетување можат да добијат оние земојделци кои имаат имотен лист за земјиштето, но тука е проблем со оние кои користат и обработуваат земјоделско земјиште под наем, тогаш за да добијат обесштетување тие мора да приложат доказ, односно документ, преку нотар, дека земјиштето им е земено под наем“, велат од Општина Тетово.

Поплавени улици и објекти, блокирани патишта, заглавени возила, уништени земјоделски посеви. Секое лето во Тетово е истата слика по поројнитте дождови кои се сè почести. Природата, но и нефункционалноста на институциите си го земаат данокот. Деновиве во два наврати Тетово и селата пливаа во вода.

ВИДЕО: Во Тетово домови под вода, заглавени и оштетени возила, запустени ниви