Во 13 часот во Градскиот парк во Кочани започна протест, по вчерашната несреќата во која во пожар во дискотека загинаа 59 млади лица. Градот денеска е исполнет со тага.

Протестот се одвива мирно, истакнати се безброј транспаренти. Стотици граѓани низ солзи и тага бараат правда и одговорност.

– Не можеме да ги вратиме нашите мили сограѓани, но сме должни да се бориме во нивна чест и за нив да го смениме овој неефикасен систем кој не обезбедува сигурност, благосостојба и праведност. Граѓаните бараат конкретни промени. Ќе се борат за град без партиски вработувања, за институции кои функционираат, за полиција која е тука за нас, за инспекциски служби кои ќе ги вршат своите обврски, за јавни простори кои ќе бидат безбедни и чисти. Протестот е за правдата, за секој од нас, за секоја жртва која што ја изгубивме и за сите нас кои го живееме овој град секој ден – пишува во најавата на социјалните мрежи.

Претходно, на плоштадот во Кочани граѓаните во редици се собираа да се потпишат во книгата на жалост и да запалат свеќа за загинатите.