Колку е нечисто и запуштено Скопје му е познато на секој негов жител, а на сите гости во главниот град, без оглед дали се од други градови низ државата или од странство, доволна им е една прошетка за да се уверат во негрижата која се гледа на секој чекор.

Матка е преплавена од ѓубре, до Аквадуктот чија околина е несредена и само повремено се чисти, повеќето не знаат ни како да стигнат, под Камени мост вирее измет и нечистотија, по шеталиштата се искршени плочките, Аква паркот не работи, нема забавен парк. И така може да се набројува до недоглед, но очигледно она што им пречи на луѓето, воопшто не ги засега надлежните.

Едноставно, не е јасно и како може колку толку да се одржува еден дел од градот, а друг да се „заборави“ цела година, па и повеќе. На пример, кејот „13 Ноември“ во најголемиот дел се одржува, особено позади ГТЦ каде што се наоѓаат угостителски објекти, кои се многу посетувани во летните денови. Тоа што овие локали цело лето узурпираат дел од шеталиштето и инспекциите не можат да воведат ред и што во водите на Вардар е закотвена полупеплосана и распадната галија, е друг проблем. Битно е дека хигиената донекаде се одржува.

Но, од другата страна на Вардар, на кејот „Димитар Влахов“, поточно од улицата Филип Втори Македонски, па до булеварот Крсте Петков Мисирков, па и понатаму накај МКЦ, повеќе од очигледно е дека комуналците и вработените од „Паркови и зеленило“ одамна не свратиле – сѐ е запуштено, обраснато и нечисто.

На кејот покрај црквата „Света Богородица“, лисјата од дрвјата што паднале минатата есен ќе ја дочекаат и оваа есен. Залепени и натапкани на плочките, од нив се затнати и сливниците.

Канделабрите на овој потег се рѓосани, повеќето нефункционални, со извадени и искинати жици, а некои од извалканите светилки се заплеткани во крошните на дрвјата, чии гранки одамна не се поткастрени. Има и стилизирана чешмичка до која не може да се пријде од тревите израснати околу неа. На целиот простор и околу дрвјата, тревите и диво израснатото зеленило е високо по еден метар, а веќе вообичаено тука е и неизбежното ѓубре.

Секојдневно поминувам оттука кога одам на работа и никогаш ништо не се менува. Сѐ е запуштено, треви израснати, пожолтени, како џунгла. Верувајте, овде не се собрани лисјава откако паднале од дрвјата. А прометен дел е, веднаш до црквата, луѓе има постојано. Еве сега се ближи голем празник, па можеби ќе се сетат барем сега да исчистат, да искосат, да ги поткастрат гранките. Иако се сомневам – вели скопјанка која реагираше во нашата редакција укажувајќи на состојбата во овој дел од централното подрачје.

Притоа и ЈП „Паркови и зеленило“, задолжено за јавното градско зеленило и „Комунална хигиена“ чија надлежност е хигиената во Скопје, постојано информираат за секојдневните активности.

Но, овој дел од градот не го спомнуваат, иако е одговорност на Град Скопје и неговите јавни претпријатија.