Главниот пат низ Галичник, кој се оштети и стана непрооден за автомобили кога дел пропадна во големо свлечиште на 26 април, сè уште е во истата состојба, а од надлежните нема ниту најава кога би можел да биде саниран.

Месната заедница од Галичник испратила допис до Општината Маврово и Ростуше, но оттаму стигнал одговор дека не се во можност да го решат проблемот. По ова, месната заедница ја замолила општината барем да испрати допис до Владата и до претседателката Гордана Сиљановска Давкова, со барање патот да се поправи.

Ова се случува на помалку од два месеца пред одржувањето на традиционалната Галичка свадба на 13 јули – централниот туристички настан на годината во Галичник, кога во селото доаѓаат голем број посетители, многумина од нив и од странство.

Ситуацијата посебно го засега единствениот хотел во Галичник, „Неда“, каде велат дека уништениот пат им предизвикува големи проблеми и можна штета од откажани резервации.

„Оваа состојба сериозно го попречува нашето редовно работење. Гостите кои имаат резервации во хотелот не можат да пристигнат со возила, туку се принудени да пешачат од селото до хотелот и ресторанот, што резултира со откажување на резервации, незадоволство и финансиски загуби. За традиционалната Галичка свадба нашиот хотел е целосно букиран од странски посетители, за кои стравуваме дека ќе ги откажат своите резервации доколку патот не биде навремено саниран“, вели Павле Камилоски од хотел „Неда“, потсетувајќи дека регионот има исклучително културно и туристичко значење за државата.

ФОТО: Големо свлечиште на главниот пат за Галичник – загрозено е движењето на жителите и туристите