Ракометниот клуб Алкалоид следната сезона, во која ќе се натпреварува и во Европската лига, ќе има четворица нови ракометари во составот. Нови играчи се репрезентативецот на Македонија, десниот бек Мартин Велковски, младиот пикер Стефан Стојчевиќ, а за првпат во екипата ќе има и интернационалци, левото крило Арно Бинго од Франција и голманот од Куба Алехандро Ромеро.

Бинго (35) играчки ќе биде најискусното име во нашата екипа кога станува збор за неговата биографија. Поранешен репрезентативец на Франција, а во текот на кариерата настапуваше за португалските екипи Бенфика и Спортинг, како и за француските Трембле и Монпелје.

Ромеро е вториот странски ракометар, голман роден во 1994 година, а стоеше меѓу стативите на Екс Провaнс, во чии редови имаше завиден процент на одбрани. Кубанецот бранеше и за Понто Комбо од Франција, шведскиот клуб Онередс Аристика и Порто од Португалија.

Велковски е 26-годишен десен бек кој доаѓа од тимот на РК Еурофарм Пелистер, а претходно настапуваше за РК Металург. Има настапувано за македонската репрезентација на ЕП во Хрватска во 2018, ЕП во Австрија 2020, СП во Египет 2021 и на ЕП во Унгарија 2022.

Стојчевиќ е пивот кој има 20 години, висок е 207 сантиметри, а доаѓа од РК Бутел Скопје. Важи за голем ракометен потенцијал, кој ќе добие одлична можност за развој во РК Алкалоид, чија стратегија уште останува истата – афирмација на најдобрите млади имиња од Македонија.

Со овие четворица играчи стручниот штаб предводен од тренерот Кирил Лазаров ќе добие повеќе искуство на теренот, проверен квалитет и опции за игра, а тимот ќе стане поконкурентен за настапите во домашната Суперлига и во ЕХФ Европската лига.