Навивачите на Интер се подготвуваат да му посакаат пеколно „добредојде“ на Ромелу Лукаку при гостувањето на Рома во недела, но во целост да ја исполнат својата намера ги спречува Фудбалската федерација на Италија.

Имено, навивачите подготвуваа 30.000 свирчиња кои сакаа да ги употребуваат секогаш кога Лукаку ќе ја допре топката.

Но, Фудбалската федерација на Италија им ги расипа плановите со забраната да се користат свирчиња за време на натпреварот. Ултрасите на Интер преку социјалните мрежи искажаа незадоволство од ваквата одлука.

„Свирчињата забранети!! 10.000 во Фиренца беа во ред пред две години. Законот не е еднаков за сите“, објавија фановите на „нероаѕурите“.

Ситуацијата на која потсетуваат навивачите на Интер се случи на натпреварот помеѓу Фиорентина и Јувентус во март 2022 година кога беше исвиркуван Душан Влаховиќ.