„Квалитетот на воздухот е опасен“ покажува вечерва апликацијата „Мој воздух“ кој го мери квалитетот на воздухот кој го дишат жителите на главниот град покажувајќи вредност од 445 µg/m3 ПМ10 честички.

Тие што вечерва се надвор може да забележат дека има и магла и „прст пред око не се гледа“, а дека нешто не е во ред и со мирисот може да забележи секој со поизострени сетила ако ја тргне маската од лицето.

Ете во едни такви околности вечерва православни верници во повеќе маала низ Скопје излегоа да ја испочитуваат традицијата и во очи Бадник да ги запалат коледарски огнови, древен пагански обичај кој се вгнездил во религиозната традиција на македонските православци и се почитува векови наназад.

Коледарските огнови важат за превесник на Бадник и според народните верувања се палат за да можат коледарите да се стоплат пред да одат од врата на врата и да ја шират радосната вест за Христовото раѓање. Оганот е симбол на оној во пештерата каде бил роден Христос Спасителот.

Ви пренесуваме атмосфера од коледарските огнови во Ново Лисиче и Аеродром каде се пие топла ракија, греано вино, се јаде риба и други посни јадења кои обично ги подготвува семјеството на оној кај кого минатата година се паднала паричката во погачата – кумот на оваа прослава:

Инаку генерално препораките за коледарските огнови, посебно во време на високо ниво на опасни ПМ10 честички во воздухот е да не се горат опасни и несоодветни материјали како гуми, пластика, делови од мебел, материјали премачкани со боја и лепило, отпадно масло од автомобили со што уште повеќе би се придонело кон зголемувањето на загадувањето на Скопје кое и онака руши неславни рекорди по здравјето на своите граѓани.