Во ек на жолчната дебата околу измените на Законот за работни односи, кој е дел од пакетот закони врзани со договорот со конзорциумот  „Бехтел и Енка“ за изградба на патните коридори 8 и 10Д, кои Владата ги достави во Собранието со европско знаменце, претседателот на собраниската комисија за европски прашања, Арбр Адеми пријатно ја изненади својата колешка од опозицијата, Гордана Силјановска Давкова.

Имено, Адеми стана од пултот и и` подари букет цвеќиња на пратеничката Гордана Силјановска.

Додека траеше честитањето на 68-от роденден на пратеничката од ВМРО-ДПМНЕ и професорка, нејзините колешки од партијата дофрлаа:

-Еве сега ќе се гаѓаме со цвеќиња, така е европски, извикуваа пратеничките.

Инаку, Владата до Собранието достави пет предлог-закони: за работни односи, за урбанистичко планирање, за градење, за експропријација и за утврдување на јавен интерес за да се донесат по скратена постапка, на што остро се противи опозицијата.