Американскиот производител на автомобили Форд повлече речиси 500.000 возила во Соединетите Американски Држави поради проблеми со системот за сопирање, соопшти денес Националната администрација за безбедност на сообраќајот на автопатиштата (NHTSA).

Повлекувањето се однесува на моделот SUV Форд Еџ произведен помеѓу 2015 и 2018 година, како и на луксузниот седан Линколн МКХ од 2016 до 2018 година, објавува Ројтерс.

Според официјален извештај, евентуалното пукање на цревото во системот за сопирање на возилата може да доведе до истекување на течност и да го зголеми ризикот од сообраќајна несреќа.

Сепак, компанијата нагласи дека досега не се пријавени инциденти или повреди поврзани со овој проблем.

NHTSA проценува дека околу еден процент од овие возила всушност го имаат дефектот.

Покрај тоа, Форд истовремено повлекува повеќе од 213.000 возила поради неисправни задни светла, како и околу 100.900 автомобили кои се изложени на ризик од кинење на воздушните перничиња при нивно активирање, додаде британската агенција.